പ്രഷർ പമ്പ് എന്ത് എന്തിന്?

 പ്രഷർ പമ്പ് എന്ത് എന്തിന്?

 

 നല്ല ഒരു ഹോട്ടലിൽ കയറിയാൽ അവിടുത്തെ വാഷ് റൂമിലെ ടാപ്പിൽ നിന്ന് വരുന്ന നുരഞ്ഞ് പതഞ്ഞ പാല് പോലുള്ള  വെള്ളം നമ്മളെ വല്ലാതാകർഷിക്കും!

എന്ത് കാശായാലും വേണ്ടില്ല അതൊരെണ്ണം വാങ്ങി വീട്ടിൽ ഫിറ്റ് ചെയ്യണമെന്ന് അപ്പോൾ തന്നെ കരുതും.

പല പ്രാവശ്യം മറക്കുമെങ്കിലും എപ്പോഴെങ്കിലും ഓർമ്മ വരുമ്പോൾ ഇല്ലാത്ത കാശ് കൊടുത്ത് ടാപ്പ്  ഒരെണ്ണം വാങ്ങി ചെയ്യാത്ത പണിയായതിനാൽ നടുവും തണ്ടക്കണ്ണിയും കളഞ്ഞ് മെനക്കെട്ടിരുന്ന് അങ്ങോട്ട് പിടിപ്പിക്കും.

ഭാര്യയും, പിള്ളാരും, അഛനും, അമ്മയും എല്ലാം പ്രതീക്ഷയോടെ നോക്കി നിൽക്കുമ്പോൾ ടാപ്പിൻ്റെ സ്വിച്ച് ഓൺ കർമ്മം തനിയെ അങ്ങ് അങ്ങാട്ട് നിർവ്വഹിക്കും!.

ഹാ അതാ വെള്ളം വരുന്നുണ്ട്... അമ്പേ! നേരത്തേ വന്നിരുന്നതിലും കഷ്ടമായിട്ടാണല്ലോ ഇപ്പോൾ വെള്ളം വരുന്നത്.

ജ്യോതിയും വന്നില്ല, തീയും വന്നില്ല.. നുരയുമില്ല, പതയുമില്ല..

ചിരി മനസിൽ ഒതുക്കി നമ്മളെ നോക്കുന്ന വീട്ടുകാരോട് ഉള്ളിലെ ചമ്മൽ മറച്ച് ... അയ്യോ
 കടക്കാരൻ പറ്റിച്ചു!  ടാപ്പ് വേറെയാ തന്നത് എന്ന് പറഞ്ഞ് തൽക്കാലം രക്ഷപെടാം...

പ്ലംമ്പിങ്ങിൻ്റെ മറുകര കണ്ട ആളാണ്.. കുറച്ച് സോൾവെൻ്റ് സിമൻ്റും, ഒരു ഒടിഞ്ഞ ഹാക് സോബ്ലേഡും, വാ പോയ ഒരു പൈപ്പ് റേഞ്ചുമുണ്ടെങ്കിൽ എന്ത് പ്ലമ്പിങ്ങും ചെയ്യാമെന്നുള്ള അഹങ്കാരം അങ്ങ് തീർന്ന് കിട്ടി.

അൽപ്പം വിവരമുള്ള ഒരു പ്ലമ്പറോട് ചോദിച്ചപ്പോൾ അവൻ പറഞ്ഞു.. ഓ അത് ടാപ്പ് മോശമായിട്ടല്ല വെള്ളത്തിന് പ്രഷറില്ലാഞ്ഞിട്ടാണ് ഒരു പ്രഷർ പമ്പ് വാങ്ങി ഫിറ്റ് ചെയ്യ്.

അതെന്താ പ്രഷറില്ലാത്തത്? ഇന്നലെ വരെ പ്രഷർ ഉണ്ടായിരുന്നല്ലോ.. ഈ സാധനം വച്ചപ്പോൾ പ്രഷർ എവിടെപ്പോയി ? വല്യ  ഇലക്ട്രോണിക്സ് ടെക്നീഷ്യനെന്ന അഹംഭാവം ഉള്ളിൽ കിടക്കുന്നതിനാൽ ആരോടെങ്കിലും വിശദമായി ചോദിച്ച് മനസിലാക്കാനൊരുമടിയും...

 പ്രഷർ പമ്പ് എന്നാൽ പെയിൻ്റ് വരെ തെറിച്ച് പോകുന്ന പ്രഷറിൽ കാറ് കഴുകുന്ന പോർട്ടബിൾ പ്രഷർ വാഷറാണ് നമ്മുടെ മനസിലേക്ക് കടന്നു വരുന്നത്. എന്നാൽ  ഈ പേരിൽ മറ്റൊരു ചങ്ങാതി ഇപ്പോൾ ഇലക്ട്രിക് കടകളിൽ തൻ്റെ സാന്നിദ്ധ്യം അറിയിച്ചിട്ടുണ്ട്. അവനാണ് വാട്ടർ പ്രഷർ ബൂസ്റ്റർ പമ്പ്.

ഇന്നത്തെ ഇടത്തരക്കാരുടെ വീടുകളിൽ പോലും സ്പായും, ജാകൂസിയും, ബോഡി ജെറ്റും, പാനൽ ഷവറും, മിസ്സി റയിനും, വാട്ടർ ഫിൽറ്ററും, നുരയും പതയും വരുന്ന ആധുനിക ഷവറുകളും, ടാപ്പുകളും, ഓട്ടോമാറ്റിക് വാഷിങ്ങ് മെഷീനും, ഡിഷ് വാഷറുമെല്ലാം ഉപയോഗത്തിലായതോടെ പ്രഷറില്ലായ്മ ഒരു പ്രശ്നമായത്.

ഇത്തരം ഉപകരണങ്ങൾ പ്രവർത്തിക്കണമെങ്കിൽ മിനിമം ഒന്നര ,രണ്ട്  ബാർ പ്രഷർ വേണം ( പ്രഷറിൻ്റെ അളവ് കോലാണ് ബാർ.. PSI എന്ന അളവുമുണ്ട് 2 ബാർ എന്നാൽ 29 PSI ) വീട്ടിലെ വാട്ടർ ടാങ്ക് ടാപ്പിൽ നിന്നും 20 മീറ്റർ ഉയരത്തിൽ വച്ചിരുന്നാലേ 2 ബാർ പ്രഷർലഭിക്കൂ.

സാധാരണ ഗതിയിൽ ഇത് സാദ്ധ്യമല്ല. അതിനാലാണ് നമ്മൾ വീട്ടിൽ പുതിയ വാഷിങ്ങ് മെഷീനോ, നുരയും പതയും വരുന്ന ടാപ്പോ എല്ലാം വാങ്ങിച്ച് വച്ചാൽ  പ്രഷറില്ലായ്മ മൂലം അവയുടെ ശരിയായ പെർഫോമൻസ് ലഭിക്കാത്തത്.

വാട്ടർ പ്രഷർ 20 PSIക്ക് ( പൗണ്ട് പെർ സ്ക്വയർ ഇഞ്ച് PSI ) താഴെപ്പോയാൽ ഫുള്ളി ഓട്ടോമാറ്റിക് വാഷിങ്ങ് മെഷീനുകൾ പണിമുടക്കും.

ഇത്തരം ആവശ്യങ്ങൾക്ക്  കൃത്രിമമായി വാട്ടർ പ്രഷർ ഉയർത്തുന്നതിന്  നമുക്ക് ഒരു പ്രഷർ പമ്പ്  ഉപയോഗിക്കാം..

 നമ്മുടെ ആവശ്യാനുസരണം ഇത്തരം പമ്പുകളുടെ പ്രഷർ സെറ്റ് ചെയ്യാൻ സാധിക്കും.ഏതെങ്കിലും ടാപ്പ് തുറന്നാൽ പൈപ്പ് ലൈനിലെ പ്രഷർ വേരിയേഷൻ മനസിലാക്കി പ്രഷർ പമ്പ് തനിയെ ഓണായിക്കോളും. അതിനാൽ ഈ പമ്പിൻ്റെ സ്വിച്ച് എപ്പോഴും ഓണാക്കിയിട്ടാലും ആവശ്യ നേരത്ത് മാത്രമേ ഓണാകൂ വൈദ്യുതി പാഴാകില്ല.

ചെറിയ വാട്ട്സിൽ വർക്ക് ചെയ്യുന്ന പമ്പുകൾ ലഭ്യമാണ് അതിനാൽ ഇൻവെർട്ടറിലും പ്രവർത്തിക്കും.DC യിൽ പ്രവർത്തിക്കുന്ന മോഡലുകളും ലഭ്യമാണ്.

സാധാരണ വാട്ടർ ടാങ്കിൻ്റെ ഔട്ട് ലെറ്റിലാണ് ഇത്തരം പമ്പുകൾ ഫിറ്റ് ചെയ്യുന്നത്..  



പ്രഷറില്ലായ്മ മൂലം വലയുന്ന ഏവർക്കും ഈ ബൂസ്റ്റർ പമ്പ് ഒരു ഉപകാരിയാണ്.

ഒരിക്കൽ ഉപയോഗിച്ചാൽ പിന്നെ ഇതില്ലാതെ പറ്റില്ല എന്നാകും കാര്യങ്ങൾ...പ്രഷർ പമ്പ് ഫിറ്റു ചെയ്യുന്നതിന്നു മുൻപു വീട്ടിലെ P V C പൈപ്പിന്റെ കപ്പാസിറ്റി കൂടി ,ഒന്ന് ചെക്ക് ചെയ്യണം..ഇത്രയും പ്രഷർ താങ്ങാത്ത ഉള്ളിത്തൊലി പോലുള്ള പൈപ്പുകൾ ചില കരാറ് പണിക്കാർ ഉപയോഗിക്കും..

അതിനാൽ സൂക്ഷിച്ചും കണ്ടും വാങ്ങുക. ഇതുപോലുള്ള  പ്രലോഭനങ്ങളിൽ വീഴരുത്


 വാട്ടർ പ്രഷർ പമ്പിനെ ഒന്ന് പരിചയപ്പെടുത്തുക മാത്രമായിരുന്നു ഉദ്ദേശം .. കൂടുതൽ ടെക്നിക്കൽ വിവരങ്ങൾ ഇഷ്ടം പോലെ യൂ ട്യൂബിൽ ലഭ്യമാണ്. എഴുതിയത് #അജിത്_കളമശേരി,#ajith_kalamassery, 09.07.2023.

റിപ്പയർ ചെയ്യാനുള്ള അവകാശം

 റിപ്പയർ ചെയ്യാനുള്ള അവകാശം

ഇക്കാലത്ത് ജനങ്ങൾ ഇലക്ട്രോണിക്സ് ഉപകരണങ്ങൾ റിപ്പയർ ചെയ്യുന്നില്ല, എല്ലാം യൂസ് & ത്രോയാണ്.എന്ന് ടെക്നീഷ്യൻമാർക്ക് പരാതി.

 

എന്നാൽ ഒരു ഉപകരണവും ഈട് നിൽക്കുന്നില്ല ചെറിയ തകരാർ പറ്റിയാൽ പോലും എവിടെയും ആരും റിപ്പയർ ചെയ്ത് തരുന്നില്ല, പട്ടി ചന്തയ്ക്ക് പോലെ
അതും കൊണ്ട് നടന്ന് ചെരുപ്പ് തേയുന്നത് മാത്രം മിച്ചം. അതിനാൽ അക്രിക്ക് കൊടുക്കുന്നു എന്ന് പൊതുജനം ..

എന്താണ് സത്യം?

നല്ല പണിയറിയാവുന്ന ടെക്നീഷ്യൻമാർ പോലും വാടക കൊടുക്കാൻ പോലും ഗതിയില്ലാത്തതിനാൽ വർഷങ്ങായി അവർ കൊണ്ടു നടന്നിരുന്ന സർവ്വീസ് സെൻ്ററുകൾ മനസില്ലാ മനസോടെ നിറുത്തി ഓട്ടോറിക്ഷ ഓടിക്കാനും, വയറിങ്ങിനും, പെയിൻ്റ് പണിക്കും പോവുകയാണ് എന്നത് കയ്പ്പേറിയ യാഥാർത്ഥ്യമാണ്.

ഉപഭോക്താവായ പൊതുജനത്തിന് ഈ ടെക്നീഷ്യൻമാരെ അവരുടെ ആവശ്യനേരത്ത് കണ്ടെത്താൻ ഒരു വഴിയുമില്ല എന്നത് വേറൊരു നഗ്ന സത്യം.

സ്ക്രാപ്പിൽ പോകുന്ന അധികം പഴക്കമില്ലാത്ത  ബ്ലൂടൂത്ത് സ്പീക്കറുകളും, ആംപ്ലിഫയർ, ഇൻഡക്ഷൻ കുക്കർ, മൈക്രോവേവ് ഓവൻ, വാഷിങ്ങ് മെഷീൻ എന്നിവയ്ക്കെല്ലാം നന്നാക്കാൻ പറ്റുന്ന തകരാറുകൾ മാത്രമേയുള്ളൂ.

പക്ഷേ വാങ്ങിയ കമ്പനിക്കാരെ സർവ്വീസിന് വിളിച്ചാൽ പുതിയ സാധനം വാങ്ങുന്ന കൂലി റിപ്പയർ ചാർജ് പറയുകയും ചെയ്യും.
 

ഗതികെട്ട പൊതു ജനം അവരുടെ മാറ്റിവയ്ക്കാനാകാത്ത  അവശ്യങ്ങൾ നിറവേറ്റാൻ  അവർക്കുള്ള ഒരേ ഒരു വഴിയായ പുതിയത് വാങ്ങാൻ നിർബന്ധിതരായിത്തീരുന്നു എന്ന് മാത്രം.

എന്താണിതിനൊരു പരിഹാരം പൊതുജനങ്ങൾക്ക് ആവശ്യനേരത്ത് അവരുടെ ഗൃഹോപകരണങ്ങൾ ന്യായമായ സർവ്വീസ് ചാർജിൽ തകരാറുകൾ  പരിഹരിച്ച് കിട്ടണം. ഇങ്ങനെ കിട്ടിയാൽ ഇല്ലാത്ത കാശ് മുടക്കി ആരും പുതിയത് വാങ്ങില്ല.. അഞ്ചാറ് വർഷമെങ്കിലും ഉപയോഗിച്ച് വാങ്ങിയ കാശ് മുതലാകാതെ കളയുകയുമില്ല.

ഇതിനൊരു പരിഹാരമെന്ന നിലയിൽ എറണാകുളം ജില്ലയിലെ 500 ൽ അധികം വരുന്ന  ഇലക്ട്രോണിക്സ് ടെക്നീഷ്യൻമാരുടെ കൂട്ടായ്മ ഒരു ആപ്പ് ഡവലപ്പ് ചെയ്ത് ട്രയൽ റൺ നടത്തുകയാണ്.

ഇത് ഒരു ക്ലൗഡ് സെർവ്വർ ആപ്ലിക്കേഷൻ മാത്രമായതിനാൽ ഒന്നും നമ്മുടെ ഫോണിലേക്ക് ഡൗൺലോഡ് ചെയ്ത് ഇൻസ്റ്റാൾ ചെയ്യേണ്ടതില്ല എന്നതാണ് ആകർഷകമായ സവിശേഷത.

വാഹനങ്ങളിലും, സ്ഥാപനങ്ങളിലും, ഈ ആപ്പിൻ്റെ QR കോഡ് ഒട്ടിച്ചും ഉപകരണങ്ങൾ വിൽക്കുന്ന കടകളിൽ നിന്ന് അവയിൽ ഒട്ടിക്കുന്ന സ്റ്റിക്കറായും  വാട്സാപ്പ് ഗ്രൂപ്പുകളിലും മറ്റും ഷെയർ ചെയ്യുന്ന ചിത്രങ്ങളായും ഈ ക്ലൗഡ് സെർവ്വർ ആപ്ലിക്കേഷൻ്റെ ലിങ്ക് പൊതുജനങ്ങളിൽ എത്തും.

അത് ഒന്ന് സ്കാൻ ചെയ്യുകയോ, ക്ലിക്ക് ചെയ്യുകയോ മാത്രം മതി ഈ ടെക്നീഷ്യൻമാരുടെ സേവനം ആർക്കും ലഭിക്കാൻ!

എറണാകുളം ജില്ലയിലെ തിരഞ്ഞെടുക്കപ്പെട്ട 50 ടെക്നീഷ്യൻമാർ ഇപ്പോൾ ട്രയൽ റണ്ണിൻ്റെ ഭാഗമാണ്.

നിങ്ങൾ എത് തരത്തിലുള്ള ഇലക്ട്രോണിക്സ്, ഇലക്ട്രിക്കൽ ഉപകരണം റിപ്പയർ ചെയ്യുന്ന ടെക്നീഷ്യൻ ആണെങ്കിലും,

നിങ്ങൾക്ക് ആത്മാർത്ഥതയോടെ ഉപഭോക്താക്കളുടെ ഗൃഹോപകരണങ്ങൾ റിപ്പയർ ചെയ്ത് നൽകാൻ ആത്മവിശ്വാസം ഉണ്ടെങ്കിലും  ഈ കൂട്ടായ്മയിൽ ഭാഗമായി ധാരാളം വർക്കുകൾ നേടാം.


സ്വന്തമായി കടകൾ വേണമെന്നില്ല, വീട്ടിൽ വച്ച് റിപ്പയർ ചെയ്യുന്നവർക്കും, കസ്റ്റമർമാരുടെ വീടുകളിൽ പോയി സർവ്വീസ്  ചെയ്തു കൊടുക്കുന്നവർക്കും
ഇതിൽ യോജിച്ച് പ്രവർത്തിക്കാം.

വർക്ക് പിടിക്കുന്നതിന് സുലേഖ ഡോട്ട് കോമിലും,
ജസ്റ്റ് ഡയലിലും എല്ലാം പരസ്യം ചെയ്യുന്നതിന് വർഷം പന്ത്രണ്ടായിരം രൂപയൊക്കെ ചിലവഴിക്കുക എന്നത് ചെറുകിട ടെക്നീഷ്യൻമാർക്കൊന്നും ആലോചിക്കാൻ പോലുമാവാത്ത സ്ഥിതിയിൽ ഈ ടെക്നീഷ്യൻമാരുടെ കൂട്ടായ്മയുടെ നിസ്വർത്ഥമായ  സേവനം വളരെ പ്രശംസനീയമാണ്.

ഫോണിലൂടെ ഇവരുടെ ഈ ആപ്ലിക്കേഷനിൽ കയറി നമുക്കാവശ്യമുള്ള ടെക്നീഷ്യൻ്റെ നമ്പരിൽ തൊട്ടാൽ അത് ഓട്ടോമാറ്റിക്കായി ഡയൽ ചെയ്യുന്നതും, അവരുടെ ഷോപ്പിൻ്റെ ലൊക്കേഷനും, വഴിയും  ഗൂഗിൾ മാപ്പിൽ കാണിക്കും എന്നതും വളരെ ആകർഷകമായി തോന്നി.

 ഏതൊരു ഇലക്ട്രോണിക്സ് ഉപകരണവും മിനിമം 5 വർഷമെങ്കിലും ഉപയോഗിക്കാനുള്ള അവകാശം ഉപഭോക്താവിനുണ്ട്. അതിനവരെ സഹായിക്കാൻ ഇതിലൂടെ ടെക്നീഷ്യൻമാർക്ക് സാധിക്കും.

ഷോപ്പ് ഇല്ലാത്തവരും എന്നാൽ വാട്ടർ ലവൽ കൺട്രോളർ, LED ബൾബ്, ഇൻവെർട്ടർ,ആംപ്ലിഫയർ ബോർഡ് ,സോളാർ etc.... പോലുള്ള അനുബന്ധ പ്രവർത്തനങ്ങളിൽ ഏർപ്പെടുന്നവർക്കും ഈ ആപ്പിൽ പേര് പ്രദർശിപ്പിക്കാൻ അവസരം നൽകുമെന്ന്  ഈ കൂട്ടായ്മയുടെ ടെക്നിക്കൽ കോ ഓർഡിനേറ്ററും, സീനിയർ ടെക്നീഷ്യനുമായ  സാബു സാംസൺ പറഞ്ഞു.

 

താൽപ്പര്യമുള്ളവർക്ക് അദ്ദേഹത്തെ ബന്ധപ്പെടാം. ആപ്പിൻ്റെ ലിങ്കിൽ ക്ലിക്ക് ചെയ്ത് ചെല്ലുമ്പോൾ കടവന്ത്ര എന്ന സ്ഥലപ്പേരിനടിയിൽ അദ്ദേഹത്തിൻ്റെ നമ്പരുണ്ട്. ഗൂഗിൾ ലെൻസ് ഉപയോഗിച്ച് ഈ ലേഖനത്തോടൊപ്പമുള്ള QRകോഡ് സ്കാൻ ചെയ്തോ, ലിങ്കിൽ അമർത്തിയോ ആപ്പിൽ കയറാം.

 

ഒന്ന് കയറി നോക്കി ഈ   നവ സംരംഭത്തെ പ്രോത്സാഹിപ്പിക്കുകയും, പോരായ്മകൾ ചൂണ്ടിക്കാട്ടുകയും ചെയ്യുന്നത് അവർക്കൊരു പ്രചോദനമായിരിക്കും.

 ഇപ്പോൾ എറണാകുളത്താരംഭിച്ച ഈ സംരംഭത്തിൽ  അധികം വൈകാതെ കേരളത്തിൽ ഉടനീളമുള്ള മറ്റ് സർവ്വീസ്  ടെക്നീഷ്യൻമാരും ഭാഗമായിത്തീരും എന്ന് കരുതുന്നു.

 സർവ്വീസ് നെറ്റ് വർക്കിൽ കയറാൻ ഇവിടെ ക്ലിക്ക് ചെയ്താൽ മതി.

 

                                         അല്ലെങ്കിൽ ഈ QR സ്കാൻ ചെയ്യുക.