നിങ്ങളറിയാത്ത ഒരു സ്പീക്കർ നിർമ്മാതാവ്

 നിങ്ങളറിയാത്ത

 ഒരു സ്പീക്കർ നിർമ്മാതാവ്

 

 

 

1954ൽ നീലക്കുയിൽ എന്ന മലയാള സിനിമ നിർമ്മിച്ച് രംഗ പ്രവേശം ചെയ്ത ആദ്യകാല സിനിമാ നിർമ്മാതാവായ TK പരീക്കുട്ടി സാഹിബിൻ്റെ ഉടമസ്ഥതയിൽ 1969ൽ കൊച്ചിയിൽ തുടങ്ങിയ സൈന തീയേറ്റർ അന്നത്തെ ഏറ്റവും ആധുനിക രീതിയിലുള്ള വെസ് ട്രെക്സ് 6 ട്രാക്ക് സ്റ്റീരിയോ സൗണ്ട് സിസ്റ്റം കൊണ്ടും, 70 mm ദൃശ്യ പ്പൊലിമ കൊണ്ടും കേരളത്തിലെ സിനിമയുടെയും, ഒപ്പം സംഗീതാസ്വാദകരെയും ദൃശ്യ ശ്രാവ്യ വിസ്മയത്തിൻ്റെ കൊടുമുടിയിലെത്തിച്ച ആദ്യ സംരംഭമായിരുന്നു.

ഈ സംരഭത്തിൽ ചെറിയ ഒരു പങ്ക് വഹിച്ച എന്നാൽ തൻ്റെ പരിചയവലയത്തിനപ്പുറം അറിയപ്പെടാത്ത ഒരാളുണ്ടായിരുന്നു... പരീക്കുട്ടി സാഹിബിൻ്റെ നൂറു കണക്കിന് തോണികളിൽ ഒന്നിൻ്റെ തുഴക്കാരനായിരുന്ന മാളിയേക്കൽ കാദർ...

സൈന തീയേറ്ററിൽ ഓരോ പടം മാറുമ്പോഴും അതിൻ്റെ പരസ്യം ഒരു ചെണ്ടക്കാരൻ്റെ അകമ്പടിയോടെ തോണിയിൽ വച്ച സിനിമാ പോസ്റ്റർ സഹിതം ജലഗതാഗത മാർഗ്ഗങ്ങളാൽ സമ്പന്നമായ കൊച്ചിയിലെ ഓരോ കടവിലുമെത്തി ചെണ്ടകൊട്ടി വിളംബരം ചെയ്യുന്ന അധിക ജോലി കൂടി കാദറിനുണ്ടായിരുന്നു.

താനും ഭാര്യയും ഒപ്പം 9 മക്കളും അടങ്ങിയ കുടുംബത്തിനെ പ്പോറ്റാൻ ഏത് അധിക ജോലിയും ചെയ്യാൻ കാദറിക്ക സന്നദ്ധനുമായിരുന്നു.

കാദറിൻ്റെ.മൂന്നാമത്തെ പുത്രനായിരുന്നു ഇസ്മായിൽ .ചെറുപ്പം മുതലേ തട്ട് മുട്ട് വിദ്യകളിലും ബാറ്ററി കൂട്ടിമുട്ടിച്ച് ബൾബ് കത്തിക്കുക പോലുള്ള അതിഭയങ്കര സാങ്കേതിക വിദ്യകളിലും നിപുണനായിരുന്നു ഇസ്മായിൽ.

കൂടാതെ വാപ്പായ്ക്ക് തീയേറ്ററിലുള്ള ഫ്രീ പാസ് കരസ്ഥമാക്കി സിനിമാ കാണലും പതിവാക്കി.സൈനാ തീയേറ്ററിൽ പോയി പടം കാണുക എന്നതിനേക്കാൾ പ്രൊജക്റ്റർ റൂമിൽ കയറി അവിടെയിരിക്കുന്ന ആംപ്ലിഫയറുകളും, റെക്കാഡ് പ്ലയറും, സ്പീക്കറുകളുമൊക്കെ തൊട്ടും പിടിച്ചും നോക്കുകയും, ഇവയുടെ സർവ്വീസിങ്ങിന് വരുന്ന എഞ്ചിനീയർമാരുമായി ചങ്ങാത്തം കൂടി അവർക്കൊപ്പം സഹായിയായി നിൽക്കുകയുമായിരുന്നു ഇസ്മായിലിൻ്റെ പ്രധാന ലക്ഷ്യം.

പത്താം ക്ലാസ് പാസായതോടെ ഇസ്മായിലിനെ വാപ്പാ തൃശൂർ ജില്ലയിലെ ചെന്ത്രാപ്പിന്നിയിലേക്ക് നാട് കടത്തി. അവിടെ ഇസ്മായിലിൻ്റെ അളിയൻമാരിൽ ഒരാളായ കോയാക്കയുടെ വീട്ടിലേക്കായിരുന്നു ഈ നാട് കടത്തൽ.

അവിടെ കോയയുടെ സുഹൃത്തായ റാഫേലാശാൻ്റെ കീഴിൽ കറണ്ട് പണികളിൽ താൽപ്പര്യമുള്ള മോനെ വയറിങ്ങ് പഠിപ്പിക്കുക എന്ന മറ്റൊരുദ്ദേശവും കാദറിനുണ്ടായിരുന്നു.

കുറച്ച് നാൾ അവിടെ നിന്നപ്പോഴേക്കും ഇസ്മായിലിന് ബോറടിച്ചു. കൊച്ചി കണ്ടവന് അച്ചി വേണ്ട എന്ന ചൊല്ല് കേട്ടിട്ടില്ലേ... അപ്പോൾ കൊച്ചിക്കാരനായ ഇസ്മായിലിൻ്റെ കാര്യം പറയേണ്ടതുണ്ടോ..

ഇസ്മായിൽ വലിച്ച് വിട്ട റബർ ബാൻഡ് പോലെ തിരികെ കൊച്ചിയിലെത്തി.. വീണ്ടും സൈന തീയേറ്ററിലെ സ്ഥിരം സന്ദർശകനായി

അവിടെ സ്ഥിരമായി വരാറുണ്ടായിരുന്ന ഫോട്ടോ ഫോൺ പ്രൊജക്റ്റർ കമ്പനിയുടെ ചീഫ് എഞ്ചിനീയറായ മോഹൻ ബാലാജിയുമായും, സിനിമാ കാർബൺ അടക്കം തീയേറ്ററിലേക്ക് ആവശ്യമായ കൺസ്യൂമബിൾസ് സപ്ലേ ചെയ്യുന്ന എറണാകുളം പുല്ലേപ്പടിയിൽ കാർത്തിക് സിനി സെൻ്റർ നടത്തുന്ന രാധാകൃഷ്ണൻ ചേട്ടനുമായും ഇസ്മായിൽ വളരെ സൗഹൃദത്തിലായി.

ഇവരാണ് ഇസ്മായിലിനെ പള്ളുരുത്തിയിൽ മെലോഡീസ് എന്ന സ്പീക്കർ വൈൻഡിങ്ങ് സ്ഥാപനം നടത്തിയിരുന്ന മോഹനൻ ചേട്ടൻ്റെയടുത്തേക്ക് റക്കമൻ്റ് ചെയ്ത് വിട്ടത്.

അന്ന് കേരളത്തിലെ പ്രമുഖ ഫോട്ടോ ഫോൺ കമ്പനി അംഗീകൃത സിനിമാ തീയേറ്റർ സ്പീക്കർ റീ വൈൻഡർ മോഹനൻ ചേട്ടനാണ്.

അക്കാലങ്ങളിൽ സിനിമാ തീയേറ്ററുകളിൽ ഉപയോഗിച്ചിരുന്നത് 230 വോൾട്ട് കറണ്ട് കൊടുത്ത് സ്പീക്കറിൻ്റെ ഇലക്ട്രോമാഗ് നെറ്റ് ഓണാക്കിയ ശേഷം പ്രവർത്തിപ്പിക്കുന്ന സ്പീക്കറുകളായിരുന്നു.

കറണ്ട് കൊടുക്കാതെ ആംപ്ലിഫയർ ഓണാക്കിയാൽ സ്പീക്കർ കത്തിപ്പോകും. മനുഷ്യസഹജമായ മറവികൾ മൂലം സ്പീക്കറുകൾ കേടാകാനുള്ള സാദ്ധ്യത അന്ന് വളരെ കൂടുതലായിരുന്നു.

തമിഴൻമാരാണ് അന്നത്തെ സ്പീക്കർ വൈൻഡർമാർ ഇവർ ഓരോ തീയേറ്ററിലും കയറി ഇറങ്ങി സ്പീക്കറുകൾ നന്നാക്കിപ്പോകും.

പക്ഷേ ആധുനിക തീയേറ്ററുകൾ നഗരങ്ങളിൽ വന്നതോടെ കമ്പനി നിർദ്ദേശിക്കുന്ന വിധത്തിൽ വൈൻഡ് ചെയ്യേണ്ടി വന്നു. ഇതിന് പരിചയ സമ്പന്നനായ മോഹനൻ ചേട്ടൻ തന്നെ വേണം ..

അപ്രൻ്റീസുകളെ ഏഴയലത്ത് അടുപ്പിക്കാത്ത മോഹനൻ ചേട്ടന് ഫോട്ടോ ഫോൺ കമ്പനിയുടെ ചീഫ് എഞ്ചിനീയർ മോഹൻ ബാലാജിയുടെ റക്കമൻ്റേഷൻ തള്ളിക്കളയാനാകുമായിരുന്നില്ല.

അങ്ങനെ ഇസ്മായിൽ പള്ളുരുത്തിയിലെ മോഹനൻ ചേട്ടൻ്റെ മെലോഡീസ് സ്പീക്കർ വൈൻഡേഴ്സിൽ

പണി പഠിക്കാൻ കയറി.

ഇത് ഇസ്മായിലിൻ്റെ ജീവിതം മാറ്റിമറിച്ചു.. നീണ്ട പതിനൊന്ന് വർഷം മോഹനൻ ചേട്ടൻ്റെ കൂടെ നിന്ന ശേഷം ഗുരുവിൻ്റെ സർവ്വവിധ അനുഗ്രഹങ്ങളോടെയും കൂടി കൊച്ചിയിൽ MACK വൈൻഡേഴ്സ് എന്ന സ്ഥാപനം സ്വന്തമായി ആരംഭിച്ചു..

സ്പീക്കർ വൈൻഡിങ്ങ് രംഗത്ത് തനിക്കുള്ള നീണ്ട നാളത്തെ പരിചയം മുൻനിറുത്തി വെറും ഒരു സ്പീക്കർ റീ വൈൻഡർ എന്ന നിലയിൽ നിന്ന് മാറി ചിന്തിച്ച് സ്വന്തമായി സ്പീക്കർ നിർമ്മാണം കൂടി ഇതിനിടയിൽ ഇസ്മായിൽ ആരംഭിച്ചു.

അങ്ങനെ കേരളത്തിലെ ആദ്യ വലിയ സ്പീക്കറുകളുടെ നിർമ്മാതാവ് എന്ന പേര് ഇസ്മായിൽ സ്വന്തമാക്കി.

8 ഇഞ്ച്, 12 ഇഞ്ച്, 15 ഇഞ്ച് അളവുകളിൽ തീയേറ്റർ ഉപയോഗത്തിനാവശ്യമായ ഫുൾ റേഞ്ച്, വൂഫർ സ്പീക്കറുകളുടെ നിർമ്മാണത്തിലാണ് MACK ശ്രദ്ധ കേന്ദ്രീകരിച്ചത്.

സ്പീക്കർ നിർമ്മാണത്തിലെ ഏത് പുതിയ ടെക്നോളജിയും പഠിക്കുന്നതിൽ ഇസ്മയിൽ ബദ്ധശ്രദ്ധനായിരുന്നു.

വിദേശ നിർമ്മിത കോപ്പർ ക്ലാഡ് അലുമിനിയം വയർ (CCAW ) കോപ്പർ ക്ലാഡ് അലുമിനിയം റിബൺ (CCAR) മെറ്റീരിയലുകൾ ഉപയോഗിച്ച് ഇന്ത്യയിൽ തന്നെ ആദ്യമായി സ്പീക്കറുകൾ നിർമ്മിച്ച് തുടങ്ങിയത് MACK ആയിരുന്നു.

ഇപ്പോൾ സ്പീക്കറുകൾ കൂടാതെ സ്പീക്കറുകൾക്കും, വൂഫറുകൾക്കും അവശ്യ ഘടകമായ റബർ പെർഫോറേറ്റഡ് സറൗണ്ട് റിങ്ങുകളും, അവ നിർമ്മിക്കാനുള്ള മെറ്റൽ ഡൈകളും ബ്രിട്ടീഷ് ബ്രാൻഡായ ടാനോയിയുടെ സഹകരണത്തോടെ MACK. കേരളത്തിൽ നിർമ്മിക്കുന്നുണ്ട്.

കമ്പനിയുടെ തുടക്ക. കാലത്ത് സവിശേഷ തരത്തിലുള്ള ഹെവി ഡ്യൂട്ടി സ്പീക്കർ ബാസ്ക്കറ്റുകൾ ഇസ്മായിലിൻ്റെ ഡിസൈനിൽ എറണാകുളം ലൂർദ്ദ് ആശുപത്രിക്ക് സമീപമുള്ള ജോസഫ് ആശാൻ ലേത്തിൽ നിർമ്മിച്ച് നൽകിയിരുന്നു. ഇപ്പോൾ അവ കൊറിയയിൽ നിന്നും ഇംപോർട്ട് ചെയ്യുകയാണ്.

ഇന്ത്യയിലെ മിക്കവാറും വൻകിട തീയേറ്ററുകളിൽ കേരളത്തിൽ നിർമ്മിക്കുന്ന MACK നിർമ്മിത സ്പീക്കറുകൾ ഉപയോഗിക്കുന്നു എന്നത് നമുക്കും അഭിമാനിക്കാവുന്ന ഒരു വാർത്തയാണ്.

ഹൈ വാട്ട് തീയേറ്റർ സ്പീക്കറുകളുടെ നിർമ്മാണത്തിലേക്ക് കടന്നപ്പോഴാണ് തീയേറ്ററുകളിൽ ഉപയോഗിക്കുന്ന ആംപ്ലിഫയറുകളുടെ ലിമിറ്റേഷൻസ് ഇസ്മായിലിൻ്റെ ശ്രദ്ധയിൽ പെട്ടത്. PAയ്ക്ക് ഉപയോഗിക്കുന്ന ആമ്പുകളാണ് അന്ന് തീയേറ്ററുകളിൽ ഉപയോഗിച്ച് പോന്നത്.

ശബ്ദ ഗുണം കൂടിയ വിദേശ നിർമ്മിത പ്രൊഫഷണൽ ആമ്പുകൾക്ക് വൻ വിലയുമായിരുന്നു.

ശബ്ദ സൗകുമാര്യം കൂടിയതും ,എന്നാൽ വിദേശ ആമ്പുകളുടെ വില വരാത്തതുമായ പ്രൊഫഷണൽ ആംപ്ലിഫയറുകളുടെ നിർമ്മാണത്തിലേക്ക് കൂടെ ഇസ്മായിൽ പതിയെ കാൽ വച്ചു.

MACKഎന്ന ബ്രാൻഡിലായിരുന്നു ആ തുടക്കം. ഡോൾബി യിലെ ജോസേട്ടൻ അടക്കമുള്ള സുഹൃത്തുക്കൾ ഇതിന് മാർഗ്ഗ നിർദ്ദേശം നൽകി. അദ്ദേഹത്തിൻ്റെ പ്രീയ സുഹുത്തായ രമേഷ് നമ്പ്യാർ ഈ സംരംഭത്തിനാവശ്യമായ നിർലോഭമായ പൂർണ്ണ സാമ്പത്തിക പിൻതുണയും നൽകി.

ഇപ്പോൾ ഇന്ത്യയിലെമ്പാടും ഡീലർനെറ്റ് വർക്കും, സർവ്വീസ് പിൻതുണയുമുള്ള പ്രമുഖ ആംപ്ലിഫയർ ബ്രാൻഡായി MACK മാറിയിരിക്കുകയാണ്.

MACKൻ്റെ ആസ്ഥാനം കൊച്ചിയിലും, ആംപ്ലിഫയർ ഷോറൂമും,MACK സ്പീക്കർ റീ വൈൻഡിങ്ങ്‌ യൂണിറ്റും എറണാകുളം പള്ളിമുക്കിലാണ്.

മാക്കിൻ്റെ സ്പീക്കർ നിർമ്മാണ ഫാക്ടറി ഫോർട്ട് കൊച്ചിയിലുമാണ്.

ഹൈ വാട്ട്സ്, ഹൈ എൻഡ് പ്രൊഫഷണൽ ആംപ്ലിഫയറുകൾ, മിക്സറുകൾ, ലൈൻ അറേ സ്പീക്കർ സിസ്റ്റം, ഹൈവാട്ട് നിയോഡൈമിയം വൂഫറുകൾ, ട്വീറ്ററുകൾ എന്നിങ്ങനെ വളരെ വിപുലമാണ് MACKൻ്റെ ഉൽപ്പന്ന നിര.

18 ഇഞ്ച് 1000 വാട്ട് ഫെറൈറ്റ് മാഗ് നെറ്റ് സ്പീക്കറിന് ഏകദേശം 14 കിലോ ഭാരം വരുമ്പോൾ തുല്യ വാട്ടുള്ള അതിലും പെർഫോമൻസ് ഉള്ള 18 ഇഞ്ച് വൂഫറിന് 4 കിലോ ഭാരമേയുള്ളൂ.

ഈ വരുന്ന ഓണത്തോടനുബന്ധമായി മേക്ക് ഇൻ ഇന്ത്യ പദ്ധതി പ്രകാരം ഹോം ഓഡിയോ എന്ന പുതിയ സെഗ്മെൻ്റിലേക്ക് കടക്കാൻ ഉദ്ദേശിക്കുകയാണ് MACK

വളരെ ഗുണമേൻമയേറിയ ഓഡിയോ ഉൽപ്പന്നങ്ങൾ താങ്ങാനാകുന്ന വിലയ്ക്ക് ഓരോ വീട്ടിലും എത്തിക്കുക എന്നതാണ് MACK ഹോം ഓഡിയോയുടെ ലക്ഷ്യം.

പുതുതലമുറയും ഓഡിയോ ബിസിനസിൽ സജീവമാണ്. ഇളയ മകനായ മഖ്ബൂലാണ് MACKൻ്റെയും MACK ൻ്റെയും ടെക്നിക്കൽ സൈഡും, പ്രൊഡക്ഷൻ യൂണിറ്റുകളും കൈകാര്യം ചെയ്യുന്നത്.

ഇതിനിടെ ഒരു രഹസ്യം ! തനിക്ക് നിർലോഭമായ പിൻതുണ നൽകിയ പിതാവിൻ്റെ സ്മരണാർത്ഥമാണ് മാളിയേക്കൽ കാദർ എന്നതിൻ്റെ ചുരുക്കമായ MACK എന്ന പേര് അദ്ദേഹം തൻ്റെ സ്ഥാപനത്തിന് നൽകിയിരിക്കുന്നത്.

അറുപത്തഞ്ചാം വയസിലേക്ക് കടക്കുന്ന ഇസ്മായിലിക്ക തൻ്റെ പുതിയ ലക്ഷ്യങ്ങളിലേക്ക് അവിരാമം, അവിശ്രമം കുതിച്ച് കൊണ്ടിരിക്കുകയാണ്.

കേരളത്തിൽ നിർമ്മിക്കുന്ന പ്രൊഫഷണൽ PA സിസ്റ്റങ്ങളുടെ ബുദ്ധികേന്ദ്രമായ

ഇസ്മയിലിക്കയെ പരിചയപ്പെടാനും, സപീക്കർ നിർമ്മാണ യൂണിറ്റ് പോലുള്ളവ ആരംഭിക്കാനും, മാഗ് നെറ്റ് ചാർജർ ,ബാസ്ക്കറ്റ്, കോൺപേപ്പർ, റബർ ഗാസ്ക്കെറ്റുകൾ, ഇംപോർട്ടഡ് കോയിലുകൾ തുടങ്ങി എന്തും ഒപ്പം അദ്ദേഹത്തിൻ്റെ മാർഗ്ഗ നിർദ്ദേശങ്ങളും നിങ്ങൾക്കും ലഭ്യമാകും..

കൂടുതൽ വിവരങ്ങൾക്ക് 7012068247 എന്ന വാട്സാപ്പ് നമ്പറിൽ അദ്ദേഹത്തെ ബന്ധപ്പെടാം.എഴുതിയത് #അജിത്കളമശേരി. #Ajithkalamassery, 22.03.2024

 20 വാട്ട് ക്ലാസ് 

AB ആംപ്ലിഫയർ സർക്യൂട്ട് . 

 

 

 വില കുറഞ്ഞതും എല്ലായിടത്തും ലഭിക്കുന്നതുമായ LA 4440 ഐസി വച്ചുള്ള ഒരു 20 വാട്ട് ക്ലാസ് AB ആംപ്ലിഫയർ സർക്യൂട്ട് . വളരെ ലളിതമായതും 12 വോൾട്ട് 2 ആമ്പിയർ പവർസപ്ലേയിൽ പ്രവർത്തിക്കുന്നതുമാണിത്. Ic യുടെ നാലാമത്തെ പിന്നിന് കണക്ഷൻ ഇല്ല. ic ഒരു അലുമിനിയം ഹിറ്റ് സിങ്കിൽ ഉറപ്പിക്കണം. 18 വോൾട്ടിൽ കൂടുതൽ കൊടുത്താൽ ic ചീത്തയാകും.സ്പീക്കർ 4 ഓംസ് ആറിഞ്ച് ഫുൾ റേഞ്ച് കൊടുക്കാം

എഫ്.എം സിഗ്നൽ ബൂസ്റ്റർ

 എഫ്.എം സിഗ്നൽ ബൂസ്റ്റർ

 

 

വളരെയധികം പേർ നിരന്തരം ആവശ്യപ്പെടുന്ന ഒരു സർക്യൂട്ടാണ് എഫ്.എം സിഗ്നൽ ബൂസ്റ്ററിൻ്റേത്.

ഇതാ ഇവിടെ റേഡിയോേ കേൾക്കാൻ താൽപ്പര്യമുള്ളവർക്കായി ഒരു ഹൈ ഗയിൻ സിഗ്നൽ എഫ് എം ബൂസ്റ്ററിൻ്റെ സർക്യൂട്ട് കൊടുക്കുന്നു.

വളരെ ലളിതമായി ചെറിയ ഒരു കോമൺ pcb യിൽ ഈ സർക്യൂട്ട് നിങ്ങൾക്ക് അസംബിൾ ചെയ്യാം.

Q1, Q 2 എന്ന രണ്ട് NPN സിലിക്കോൺ ട്രാൻസിസ്റ്ററുകളാണ് ഈ സർക്യൂട്ടിൻ്റെ ക്രിട്ടിക്കൽ കോമ്പോണെൻ്റുകൾ.

2 N3904 എന്ന നമ്പരാണ് ഇതിനായി ഉപയോഗിക്കുന്നത്

L1, L2 എന്നീ രണ്ട് കോയിലുകൾ നമ്മൾ സ്വന്തമായി നിർമ്മിച്ചെടുക്കണം ഇത് പുറത്ത് വാങ്ങാൻ കിട്ടില്ല.

22 SWG എന്ന ഗേജിലുള്ള ഇൻസുലേറ്റഡ് കോപ്പർ വയർ 5 മില്ലിമീറ്റർ ഡയ മീറ്ററുള്ള ഫോർമറിൽ 4 ചുറ്റ് വൈൻഡ് ചെയ്തെടുത്ത് ഇവ നിർമ്മിക്കാം.

ഒരു ജൽ പേനയുടെ റീഫില്ലറോ,5mm ഡ്രിൽ ബിറ്റോ ഫോർമറായി ഉപയോഗിക്കാം.

L1, L2 എന്നീ കോയിലുകളുടെ സമീപത്തായി സർക്യൂട്ടിൽ കാണുന്നത് 30 pfൻ്റെ ട്രിമ്മർ കപ്പാസിറ്ററുകളാണ്. ഇവയുടെ വാല്യു ക്രിട്ടിക്കൽ അല്ല. വിപണിയിൽ ലഭ്യമായത് ഉപയോഗിക്കാം.

സർക്യൂട്ട് നോക്കി ബൂസ്റ്റർ അസംബിൾ ചെയ്യുക. 6 വോൾട്ട് മുതൽ 12 വോൾട്ട് വരെ ഈ സർക്യൂട്ടിൽ നൽകാം.

റഗുലേറ്റഡ് വോൾട്ടേജ് കിട്ടിയാൽ സർക്യൂട്ട് സ്റ്റബിൾ ആയിരിക്കും. ഇതിന് വേണ്ടി 12 വോൾട്ട് കൊടുത്ത് അതിനെ ഒരു 9 വോൾട്ട് സെനർ ഡയോഡ് വഴി ഒരു 100uf കപ്പാസിറ്റർ ഉപയോഗിച്ച് സ്റ്റേബിൾ ചെയ്ത് കൊടുത്തിരിക്കുന്നത് ശ്രദ്ധിക്കൂ.

സെനർ ഡയോഡിന് സമീപമുള്ള 150 ഓംസ് റസിസ്റ്റർ ഹാഫ് വാട്ട് ഉപയോഗിക്കണം.

സപ്ലേ കൊടുത്തതിന് ശേഷം Q1 ൻ്റെ ബേസിൽ 0.68 വോൾട്ടും ,കളക്റ്ററിൽ 3.85 വോൾട്ടും, Q 2 വിൻ്റെ ബേസിൽ 0.68 വോൾട്ട് വരുന്നുണ്ടെങ്കിൽ സർക്യൂട്ട് OKയാണ്.

കോമ്പോണെൻ്റുകളുടെ വാല്യൂ വേരിയേഷൻ മൂലവും, ട്രാൻസിസ്റ്ററിൻ്റെ Hfe വ്യത്യാസം മൂലവും ഈ വോൾട്ടിൽ ചെറിയ വ്യത്യാസങ്ങൾ വന്നാലും സാരമില്ല.സർക്യൂട്ട് പ്രവർത്തിക്കും.

അധികം വേരിയേഷനുണ്ടെങ്കിൽ അസംബിൾ ചെയ്ത സർക്യൂട്ട് ഒന്നുകൂടി ചെക്ക് ചെയ്യുക.

Q1 ട്രാൻസിസ്റ്ററിൻ്റെ ബേസിൽ നിന്നും ഒരു കേബിൾ കണക്റ്റർ ഉപയോഗിച്ച് വീടിന് പുറത്ത് സ്ഥാപിച്ച എക്സ്ട്രേണൽ ആൻ്റിനയിലേക്ക് കണക്ഷൻ കൊടുക്കുക. Q2 വിൻ്റെ കളക്റ്ററിൽ കൊടുത്തിരിക്കുന്ന 33 pf കപ്പാസിറ്ററിൽ നിന്നും ഒരു കണക്ഷൻ വയർ നമ്മുടെ FM റേഡിയോയുടെ ആൻ്റിനയിലേക്ക് കൊടുക്കുക..

വീക്കായ FM റേഡിയോ സ്റ്റേഷനുകൾ പോലും നല്ല സ്റ്റീരിയോ മോഡിൽ അടിപൊളിയായി പ്രവർത്തിക്കും.

ഗയിൻ കൂടുതലാണെങ്കിൽ Q2 ട്രാൻസിസ്റ്ററിൻ്റെ ബേസിൽ കണക്റ്റ് ചെയ്തിരിക്കുന്ന 33 pf കപ്പാസിറ്ററിൽ നിന്നും ആൻ്റിനാ ഔട്ട് എടുക്കാം.

നല്ല ക്വാളിറ്റിയിൽ വൈഡ് റേഞ്ച് FM സിഗ്നൽ ബൂസ്റ്റ് ചെയ്യുന്ന സർക്യൂട്ടാണിത്. ഫ്രിഞ്ച് ഏരിയയിൽ പോലും നന്നായി പ്രവർത്തിക്കും.

ബൂസ്റ്ററിലേക്ക് FM സിഗ്നൽ നൽകാൻ വീടിന് പുറത്തേക്കിട്ട വയറുകളോ. ഡൈ പോളോ ഉപയോഗിക്കാം.

വിദൂരതയിൽ നിന്നുള്ള FM സിഗ്നലുകൾ സ്റ്റീരിയോ മോഡിൽ ലഭിക്കണമെങ്കിൽ നല്ല ഒരു FM ആൻ്റിന ഈ ബൂസ്റ്ററിനൊപ്പം കണക്റ്റ് ചെയ്യണം.

പ്രിൻ്റ് എടുക്കുവാൻ വേണ്ടി കളറില്ലാത്ത സർക്യൂട്ട് ഫസ്റ്റ് കമൻ്റായി ചേർത്തിട്ടുണ്ട്.

കുട്ടികൾ കാരണം നിറുത്തിപ്പോയ റേഡിയോ മോഡൽ.

 

കുട്ടികൾ കാരണം നിറുത്തിപ്പോയ

 റേഡിയോ മോഡൽ.

 

 

 

പല പല കാരണങ്ങൾ കൊണ്ട് ചില മോഡലുകളുടെ നിർമ്മാണം കമ്പനികൾ അവസാനിപ്പിക്കാറുണ്ട്. എന്നാൽ കുട്ടികളുടെ വികൃതി കാരണം പോപ്പുലറായിരുന്ന ഒരു മോഡലിൻ്റെ നിർമ്മാണം ഫിലിപ്സ് റേഡിയോ കമ്പനി ഇന്ത്യയിൽ അവസാനിപ്പിച്ചിട്ടുണ്ട്. ചരിത്രത്തിൽ രേഖപ്പെടുത്താത്ത ആ കഥയാവട്ടെ ഇത്തവണ.

2002 ഫെബ്രുവരി രണ്ടിന് ഫിലിപ്സ് ഇന്ത്യ ലിമിറ്റഡ് പുറത്തിറക്കിയ ഒരു നവീന ഉൽപ്പന്നമായിരുന്നു RL 117 എന്ന ബാറ്ററി വേണ്ടാത്ത ഫ്രീ പവർ റേഡിയോ !

ഫിലിപ്സിൻ്റെ കൺസ്യൂമർ ഇലക്ട്രോണിക്സ് ഡിവിഷൻ വൈസ് പ്രസിഡൻ്റ് രാജീവ് കർവാർ മുംബയിലാണ് ഈ ഉൽപ്പന്നം ആദ്യമായി ഇന്ത്യയിൽ അവതരിപ്പിച്ചത്.

റേഡിയോയുടെ പുറക് വശത്ത് മടക്കി വച്ചിരിക്കുന്ന ഒരു ഹാൻഡിൽ നിവർത്തി ഏകദേശം 2 മിനിറ്റ് കറക്കിയാൽ ഒന്നര മണിക്കൂർ നേരം റേഡിയോ സാമാന്യം ശബദത്തിൽ പ്രവർത്തിക്കും.

ഹാൻഡിൽ തിരിക്കുമ്പോൾ ഉള്ളിലുള്ള ഡൈനാമോ കറങ്ങി അതിനോട് ബന്ധിപ്പിച്ചിരിക്കുന്ന നിക്കൽ കാഡ്മിയം റീചാർജബിൾ ബാറ്ററികൾ ചാർജാവുകയും റേഡിയോ പ്രവർത്തിക്കാനാവശ്യമായ പവർ ലഭിക്കുകയും ചെയ്യും.

FM ,MW, SW ഉൾപ്പടെ മൂന്ന് ബാൻഡ് റേഡിയോ ആയിരുന്നു RL 117.

റേഡിയോയിൽ ഉപയോഗിക്കുന്ന ബാറ്ററി പോലും ആഡംബര വസ്തുവായി കണക്കാക്കപ്പെട്ടിരുന്ന ഇന്ത്യൻ ഗ്രാമങ്ങളിലെ ജന സാമാന്യത്തിനുള്ള ഉപഹാരമായിട്ടായിരുന്നു ഫിലിപ്സ് ഈ റേഡിയോ 20 വർഷങ്ങൾക്ക് മുൻപ് പുറത്തിറക്കിയത്.

995 രൂപ നൽകി റേഡിയോ വാങ്ങിയാൽ പിന്നെ ബാറ്ററി മാറ്റിയിടുന്ന പണച്ചിലവിനെപ്പറ്റി വേവലാതി വേണ്ട എന്നതിനാൽ ഈ മോഡൽ റേഡിയോ വളരെ വേഗം ജനപ്രീയമായി . ലക്ഷക്കണക്കിന് റേഡിയോകൾ ചൂടപ്പം പോലെ വിറ്റുപോയി.

നല്ല ശബ്ദ ശുദ്ധിയും ,ഒതുക്കവും ,ഭാരക്കുറവും 117 ൻ്റെ പ്രചാരം വർദ്ധിപ്പിച്ചു.

ചാർജിങ്ങ് സംവിധാനത്തിൻ്റെ ഹാൻഡിൽ അസംബ്ലി കറക്കുന്നത് രസകരമായ ഒരനുഭവമായിരുന്നു. ഇത് മൂലം കുട്ടികൾ കണ്ണ് തെറ്റിയാൽ ഈ റേഡിയോ എടുത്ത് കളിപ്പാട്ടമായി ഉപയോഗിച്ച് കറക്കി, കറക്കി റേഡിയോയുടെ ഹാൻഡിൽ ഒടിക്കും!.

ഏതാനും മിനിറ്റുകൾ തിരിക്കാൻ വേണ്ടി മാത്രം ഡിസൈൻ ചെയ്ത ഡൈനാമോ അസംബ്ലിയെ കുട്ടികൾ ദീർഘനേരം കറക്കി തിരിക്കുമ്പോൾ ബാറ്ററി കട്ടോഫ് സംവിധാനം ഇല്ലാത്തതിനാൽ ഓവർ ചാർജ് കയറി ബാറ്ററി പോകും. അതിൻ്റെ പ്ലാസ്റ്റിക് ഗിയർ വീലുകൾ ചൂടായി പൊട്ടിപ്പോകും.

ഇങ്ങനെ കുട്ടികളുടെ ശല്യം മൂലം കേടായ റേഡിയോകളുടെ ഹാൻഡിൽ അസംബ്ലി മാറ്റിക്കൊടുത്ത് മടുത്ത ഫിലിപ്സ് കമ്പനി 2005 ൽ. ഇറക്കി 3 വർഷം കഴിഞ്ഞപ്പോൾ നല്ല ഡിമാൻഡ് ഉണ്ടായിട്ടും ഈ മോഡൽ റേഡിയോകളുടെ നിർമ്മാണം ഇന്ത്യയിൽ അവസാനിപ്പിച്ചു.

ടേപ്പ് റിക്കോർഡറുകളിൽ ഉപയോഗിക്കുന്ന ചെറിയ മോട്ടോറിനെ ഹാൻഡിൽ തിരിക്കുമ്പോൾ ഉണ്ടാകുന്ന കറക്കത്തെ ഗിയർ സംവിധാനം ഉപയോഗിച്ച് വേഗത കൂട്ടി മോട്ടോർ കോയിലിൽ ലഭ്യമാകുന്ന ആൾട്ടർനേറ്റിങ്ങ് കറണ്ടിനെ ഒരു ബ്രിഡ്ജ് റക്റ്റിഫയർ സംവിധാനം ഉപയോഗിച്ച് പൾസേറ്റിങ്ങ് DC വോൾട്ടാക്കി ബാറ്ററി ചാർജ് ചെയ്യുക എന്നതായിരുന്നു ഈ റേഡിയോയുടെ ടെക്നോളജി.

ചെറിയ DC മോട്ടോർ കറക്കി LED കത്തിക്കുന്നതിൻ്റെ പരിഷ്കൃത രൂപം എന്ന് കരുതിയാൽ മതി.

ഇക്കാലത്ത് വളരെ അപൂർവ്വമായ RL 117 free power മോഡൽ റേഡിയോ കളക്റ്റേഴ്സിൻ്റെ ഇടയിൽ ഒരു സൂപ്പർ സ്റ്റാറാണ്. എഴുതിയത് #അജിത്_കളമശേരി 14.12.2023,#ajithkalamassery

12 Watt LED ബൾബിൻ്റെ കോമൺസർക്യൂട്ട്.

 12 Watt LED ബൾബിൻ്റെ കോമൺസർക്യൂട്ട്. കമ്പനി വ്യത്യാസം അനുസരിച്ച് ചില പാർട്സുകളുടെ വാല്യൂ വ്യത്യാസം ഉണ്ടാകും. ഈ സർക്യൂട്ട് നന്നാക്കി പഠിക്കുന്നവരുടെ റഫറൻസിന് വേണ്ടി മാത്രം.

 

 

 

7 Watt LED ബൾബിൻ്റെ കോമൺസർക്യൂട്ട്.

 7 Watt LED ബൾബിൻ്റെ കോമൺസർക്യൂട്ട്. കമ്പനി വ്യത്യാസം അനുസരിച്ച് ചില പാർട്സുകളുടെ വാല്യൂ വ്യത്യാസം ഉണ്ടാകും. ഈ സർക്യൂട്ട് നന്നാക്കി പഠിക്കുന്നവരുടെ റഫറൻസിന് വേണ്ടി മാത്രം.

 

 

9 Watt LED ബൾബിൻ്റെ കോമൺസർക്യൂട്ട്

 9 Watt LED ബൾബിൻ്റെ കോമൺസർക്യൂട്ട്. കമ്പനി വ്യത്യാസം അനുസരിച്ച് ചില പാർട്സുകളുടെ വാല്യൂ വ്യത്യാസം ഉണ്ടാകും. ഈ സർക്യൂട്ട് നന്നാക്കി പഠിക്കുന്നവരുടെ റഫറൻസിന് വേണ്ടി മാത്രം.

 

L M 317 വേരിയബിൾ പവർ സപ്ലേ സർക്യൂട്ട്

 L M 317 വേരിയബിൾ  പവർ സപ്ലേ സർക്യൂട്ട്

 

ഒന്നര വോൾട്ട് മുതൽ 35 വോൾട്ട് DC വരെ വളരെ സ്മൂത്തായി കൺട്രോൾ ചെയ്ത് ഔട്ട്പുട്ട് നൽകുന്ന റഗുലേറ്റർ ഐസിയാണ് LM 317. ഈ വേരിയബിൾ വോൾട്ടേജ് റഗുലേറ്റർ ഐസി സുലഭമായി നമ്മുടെ നാട്ടിൽ ലഭിക്കുന്നുണ്ട്. ഒറിജിനലിനേക്കാൾ കൂടുതൽ ഡൂപ്ലികളാണ് കിട്ടുന്നതെന്ന് മാത്രം! ഈ ഐസിയുടെ ഹീറ്റ് സിങ്ക് ടാബ് ഒറിജിനലിന് നല്ല കനമുണ്ടാകും ഇത് ശ്രദ്ധിച്ചാൽ ഒരു പരിധി വരെ നല്ലത് നോക്കി വാങ്ങാം. ചൈനീസ് ചാത്തൻ്റെ ഹീറ്റ് സിങ്ക് ടാബ് പാട്ട പോലെ കനം കുറഞ്ഞതായിരിക്കും.

ഈ ഐ സിക്ക് നല്ല ഒരു ഹീറ്റ് സിങ്ക് കൊടുക്കണമെന്നുള്ള കാര്യം മറക്കരുത്. 40 വോൾട്ടാണ് മാക്സിമം DC ഇൻപുട്ട് അതിൽ കൂടുതൽ ഈ ഐ.സി താങ്ങില്ല. 40 വോൾട്ട് കൊടുത്താൽ ഒന്നര മുതൽ 35 വോൾട്ട് വരെ റഗുലേറ്റഡ് DC ലഭിക്കും. വോൾട്ടേജ് കൺട്രോൾ ചെയ്യിക്കുന്ന പൊട്ടെൻഷ്യോ മീറ്റർ വേരിയബിൾ റസിസ്റ്റൻസിൻ്റെ ശാസ്ത്രീയ നാമം) നല്ല ക്വാളിറ്റിയുള്ളത് ഉപയോഗിക്കണം. കുറച്ച് വില കൂടിയാലും വയർ വൗണ്ട് ടൈപ്പ് കിട്ടിയാൽ ഉത്തമം. ക്വാളിറ്റിയുള്ളത് ഉപയോഗിച്ചാൽ പ്രവർത്തിച്ച് കൊണ്ടിരിക്കുമ്പോൾ തനിയെ വോൾട്ട് മാറിപ്പോകില്ല.

ചെറിയ 5 V ബ്ലൂടൂത്ത് ബോർഡുകൾ ടെസ്റ്റ് ചെയ്യാനും, വീക്കായ ലിഥിയം അയോൺ ബാറ്ററികൾ ബൂസ്റ്റ് ചെയ്യാനും, ചാർജ് ചെയ്യാനുമെല്ലാം ഇതുപകരിക്കും.

മാക്സിമം വൺ ആമ്പിയറേ ഈ ഐ സി കൈകാര്യം ചെയ്യൂ.

കൂടുതൽ ആമ്പിയർ ലഭിക്കുന്ന വിധം മാറ്റം വരുത്തിയ LM 317 വച്ചുള്ള സർക്യൂട്ട് താമസിയാതെ ഇടാം.

D1, D2 എന്നിവ പ്രൊട്ടക്ഷൻ ഡയോഡുകളാണ്. ഐസിയുടെ മൂന്നാമത്തെയും, രണ്ടാമത്തെയും പിന്നുകളിൽ നിന്ന് എർത്ത് ചെയ്തിരിക്കുന്ന 0.1 കപ്പാസിറ്ററുകൾ വളരെ പ്രധാനപ്പെട്ടതാണ്.

ഇവയില്ലെങ്കിൽ ഇൻ്റേണൽ ഓസിലേഷൻ ഉണ്ടായി ഓഡിയോ സർക്യൂട്ടുകളിൽ നോയ്സും വരും,ഐസി കൂടുതൽ ചൂടാവുകയും ചെയ്യും.

ഈ 0. I കപ്പാസിറ്ററുകൾ ഐസിയോട് ഏറ്റവും ചേർന്നിരിക്കത്തക്കവിധം സോൾഡർ ചെയ്യുക.

ഇൻപുട്ടിലും, ഔട്ട്പുട്ടിലും നിങ്ങളുടെ ആവശ്യാനുസരണമുള്ള ഫിൽറ്റർ കപ്പാസിറ്റുകൾ കൊടുക്കാവുന്നതാണ്. അവ ഈ സർക്യൂട്ടിൽ കാണിച്ചിട്ടില്ല.

24.0 ട്രാൻസ്‌ഫോർമറിൽ നിന്ന് ബ്രിഡ്ജ് റക്റ്റിഫയർ ഉപയോഗിച്ച് റക്റ്റി ഫൈ ചെയ്ത DC വോൾട്ടേജ് ആവശ്യമായ ഫിൽറ്റർ കപ്പാസിറ്ററുകൾ കൊടുത്തതിന് ശേഷം ഈ റഗുലേറ്റർ സർക്യൂട്ടിലേക്ക് നൽകുക.

ഒരു DC വോൾട്ട് മീറ്റർ ഔട്ട് പുട്ടിൽ കണക്റ്റ് ചെയ്യുന്നത് വോൾട്ടേജ് കണ്ട് മനസിലാക്കാൻ ഉപകരിക്കും.

ടെസ്റ്റ് ബഞ്ച് പവർ സപ്ലേക്കായി ഒരെണ്ണം ചെയ്ത് നോക്കൂ.

ഫ്ലൈ വീൽ ബാറ്ററി .

 

3, ഫ്ലൈ വീൽ ബാറ്ററി .

 ബാറ്ററികളുടെ പകരക്കാർ

 

 

വലിയ ഭാരമേറിയ ഫ്ലൈവീലുകൾ വായൂരഹിത വാക്വം ചേമ്പറുകളിൽ പകൽ സമയം ലഭിക്കുന്ന സോളാർ വൈദ്യുതി ഉപയോഗിച്ച് പ്രവർത്തിക്കുന്ന മോട്ടോറുകളുടെ സഹായത്താൽ ഉയർന്ന വേഗതയിൽ കറക്കുകകയും, രാത്രി നേരം ഈ ഫ്ലൈവീലുകളുമായി ബന്ധിപ്പിച്ച ജനറേറ്ററുകൾ മുഖേന വൈദ്യുതി ഉൽപ്പാദിപ്പിച്ച് ഗ്രിഡിലേക്ക് നൽകുകയും ചെയ്യുന്ന സംവിധാനം.

പരമാവധി 4 മുതൽ 5 മണിക്കൂർ നേരം വരെയൊക്കെയേ ഈ ഫ്ലൈവീൽ ബാറ്ററിയിൽ സംഭരിക്കപ്പെട്ട കൈനറ്റിക് എനർജിയിൽ നിന്ന് വൈദ്യുതി ഉൽപ്പാദനം സാദ്ധ്യമാകൂ. എന്നിരുന്നാലും പീക്ക് ലോഡ് കൈകാര്യം ചെയ്യാൻ ഈ സംവിധാനം ഉപകരിക്കും.

സഞ്ചരിക്കുന്ന മേഖങ്ങൾ സൂര്യനെ മറയ്ക്കുന്നത് മൂലം സോളാർ വൈദ്യുതി ഉൽപ്പാദനത്തിൽ ചില നേരങ്ങളിൽ അടിക്കടി ഉണ്ടാകുന്ന ഏറ്റക്കുറച്ചിലുകൾ പരിഹരിക്കാനാണ് ഫ്ലൈ വീൽ ബാറ്ററികൾ കൂടുതലായി വൻകിട സോളാർ പാടങ്ങളിൽ ഉപകരിക്കുന്നത്.

ഇരുപതിനായിരം മുതൽ അൻപതിനായിരം വരെയുള്ള ഉയർന്ന വേഗതയിലാണ് ഇൻഡസ്ട്രിയൽ ഫ്ലൈ വീൽ ബാറ്ററികൾ പ്രവർത്തിക്കുന്നത്.

തേയ്മാനം ഒഴിവാക്കാനായി മാഗ്നെറ്റിക് സസ്പെൻഷൻ ബയറിങ്ങുകളിലാണ് ഇവയുടെ കറക്കം. ഫ്ലൈ വീൽ ഷാഫ്റ്റിനോട് ബന്ധപ്പെട്ട ഒരു ജനറേറ്റർ വൈദ്യുതി ഉൽപ്പാദിപ്പിച്ച് ഗ്രിഡിലേക്ക് നൽകുന്നു.

ഒരു ഹൈടോർക്ക് വേരിയബിൾ സ്പീഡ് മോട്ടോർ ഉപയോഗിച്ചാണ് ഇവയിലേക്ക് കറങ്ങുന്നതിനാവശ്യമായ പവർ നൽകുന്നത്.

1950 കളിൽ സ്വിറ്റ്സർലാണ്ടിൽ ഗൈറോ ബസുകൾ എന്ന പേരിൽ അറിയപ്പെട്ടിരുന്ന ഫ്ലൈ വീൽ അസിസ്റ്റ്ഡ് ഇലക്ട്രിക്കൽ ബസുകൾ നിലവിലുണ്ടായിരുന്നു.

ഉന്തി വിട്ടാൽ തനിയെ കുറച്ച് നേരം ഓടുന്ന കളിപ്പാട്ട കാറുകളിൽ നമുക്ക് ഈ ഫ്ലൈ വീൽ ബാറ്ററിയുടെ പ്രാഗ്രൂപം പണ്ടേ പരിചിതമാണല്ലോ.എഴുതിയത് അജിത് കളമശേരി .14.04.2024

പമ്പ്ഡ് സ്റ്റോറേജ്.

 

2. പമ്പ്ഡ് സ്റ്റോറേജ്.

 

 ബാറ്ററികളുടെ പകരക്കാർ

 

 

 

വില കുറവിൽ വൈദ്യുതി ലഭിക്കുന്ന പകൽ നേരത്ത് ആ വൈദ്യുതിയിൽ പ്രവർത്തിക്കുന്ന വലിയ പമ്പ് സെറ്റുകൾ ഉപയോഗിച്ച് താഴെയുള്ള ജലസംഭരണിയിലെ ജലം മുകളിലെ വലിയ ഡാമുകളിലേക്കോ ,വലിയ സ്റ്റോറേജ് ടാങ്കുകളിലേക്കോ അടിച്ച് കയറ്റി, വൈദ്യുതിക്ക് വില കൂടുതലുള്ള രാത്രി നേരം മുകളിലെ സ്റ്റോറേജിലെ ജലം ഉപയോഗിച്ച് ടർബൈനുകൾ കറക്കി വീണ്ടും വൈദ്യുതി ഉൽപ്പാദിപ്പിക്കുന്നു.

കൊടുക്കുന്ന കറണ്ട് ഒട്ടും പാഴാക്കാതെ ഉപയോഗിക്കുന്ന BLDC ടെക്നോളജിയിൽ പ്രവർത്തിക്കുന്ന പമ്പുകൾ ലഭ്യമായ ഇക്കാലത്ത് സോളാർ അസിസ്റ്റ്ഡ് പമ്പ്ഡ് സ്റ്റോറേജ് പവർ പ്ലാൻ്റുകൾ ഉപയോഗിച്ചാൽ ഇപ്പോൾ വെറുതെ പാഴാകുന്ന സൂര്യൻ്റെ ഓരോ വാട്ടും പ്രയോജനപ്പെടുത്താൻ നമുക്കാകും.

ഇവിടെ ചിലവേറിയ ദീർഘനാൾ ഈട് നിൽക്കാത്ത ,പരിസ്ഥിതി സൗഹാർദ്ദമല്ലാത്തകെമിക്കൽ ബാറ്ററികൾക്ക് പകരമായി വൈദ്യുതി സംഭരണത്തിന് ജലം ഉപയോഗിക്കുന്നു.

ഓപ്പൺ ലൂപ്പ് പമ്പ്ഡ് സ്റ്റോറേജ്, ക്ലോസ്ഡ് ലൂപ്പ് പമ്പ്ഡ് സ്റ്റോറേജ് എന്നിങ്ങനെ രണ്ട് തരം സ്റ്റോറേജുകളാണ് സാധാരണ ഉപയോഗത്തിലുള്ളത്.

ആദ്യ പമ്പ്ഡ് സ്റ്റോറേജ് സ്വിറ്റ്സർലാൻ്റിൽ 1907 ൽ ആരംഭിച്ചു.

ഇന്ത്യയിലും വൻകിട പമ്പ്ഡ് സ്റ്റോറേജ് ഹൈഡ്രോ ഇലക്ട്രിക് പ്രൊജക്റ്റുകൾ നിലവിലുണ്ട്. പരുളിയ പമ്പ്ഡ് സ്റ്റോറേജ് പവർ പ്ലാൻ്റ് വെസ്റ്റ് ബംഗാൾ,900 MW ,മദ്ധ്യപ്രദേശിലെ ഗാന്ധി സാഗർ അടക്കം 13 ൽ അധികം വൻകിട പ്രൊജക്റ്റുകൾ നിലവിലുണ്ട്. പ്രൈവറ്റ് സെക്റ്ററിൽ JSW, ANDRITZ അടക്കം സ്വകാര്യ കമ്പനികളുടെ പ്രൊജക്റ്റുകൾ പണി തീർന്ന് വരുന്നു.

കേരളത്തിലും പമ്പ്ഡ് സ്റ്റോറേജ് പവർ പ്ലാൻ്റുകൾക്ക് അനന്തമായ സാദ്ധ്യതകളാണുള്ളത്.

അപ്പർ റിസർവോയറിൽ നിന്ന് ബാഷ്പീകരണം മൂലമുള്ള ജലനഷ്ടം തടയുന്ന വിധം ഫ്ലോട്ടിങ്ങ് സോളാർ പാടങ്ങൾ സജ്ജീകരിക്കുന്നതിലൂടെ അതിൽ നിന്നുള്ള ചിലവ് കുറഞ്ഞ വൈദ്യുതിയും, പുരപ്പുറ സോളാർ പ്ലാൻ്റ് ഫിറ്റ് ചെയ്തിരിക്കുന്ന സാധാരണക്കാരുടെ ഗ്രിഡിലേക്കൊഴുകുന്ന മിച്ച വൈദ്യുതിയും ഉപയോഗിച്ച് KSEBക്ക് കുറഞ്ഞ ചിലവിൽ

ഡാമിൽ നിന്നും പകൽനേരം വൈദ്യുതി ഉപയോഗിച്ച ശേഷം ഒഴുക്കി കളയുന്ന വെള്ളത്തിൻ്റെ ഒരു ഭാഗം തിരികെ ഡാമിലേക്ക് പമ്പ് ചെയ്ത് കയറ്റി രാത്രിയിലെ പീക്ക് അവറുകളിൽ ധാരാളം വൈദ്യുതി ഉൽപ്പാദിപ്പിക്കാവുന്നതാണ്. പുരപ്പുറ സോളാർ ഫിറ്റ് ചെയ്തവർക്ക് സമയത്തിന് വല്ല കാശും കൊടുക്കുന്നെങ്കിൽ അതിനുള്ളതും ഇതിൽ നിന്ന് കിട്ടും.!

ചിത്രം ആൻഡ്രിറ്റ്സ് കമ്പനിയുടെ പമ്പ്ഡ് പവർ പ്ലാൻ്റ് അപ്പർ റിസർവോയർ. എഴുതിയത് അജിത് കളമശേരി .14.04.2024

ഗ്രാവിറ്റി ബാറ്ററി അഥവാ കോൺക്രീറ്റ് ബാറ്ററി.

 

1.ഗ്രാവിറ്റി ബാറ്ററി അഥവാ കോൺക്രീറ്റ് ബാറ്ററി.

 

 ബാറ്ററികളുടെ പകരക്കാർ

 

 

ടൺ കണക്കിന് ഭാരമുള്ള കോൺക്രീറ്റ് ബ്ലോക്കുകൾ പകൽ സുലഭമായി ലഭിക്കുന്ന സോളാർ എനർജി ഉപയോഗിച്ച് വലിയ മോട്ടോറുകളുടെ സഹായത്തോടെ ഉയരങ്ങളിലേക്ക് ഉയർത്തി അടുക്കി സൂക്ഷിക്കുന്നു.. വൈദുതി കൂടുതൽ ആവശ്യമായ രാത്രി സമയത്ത് ഈ ഉയർത്തി സൂക്ഷിച്ചിരിക്കുന്ന കോൺക്രീറ്റ് ബ്ലോക്കുകൾ തിരികെ താഴേക്ക് കയറ്റാൻ സഹായിച്ച അതേ മോട്ടോറിൻ്റെ സഹായത്താൽ തിരികെ ഇറക്കുന്നു. ഈ സമയത്ത് കോൺക്രീറ്റ് ബ്ലോക്കുകളിൽ ലഭ്യമായ കൈനറ്റിക് എനർജിയുടെ സഹായത്താൽ തിരിഞ്ഞ് കറങ്ങുന്ന മോട്ടോർ ഒരു ഡൈനാമോ പോലെ പ്രവർത്തിച്ച് വൻതോതിൽ വൈദ്യുതി പുറത്തേക്ക് നൽകുന്നു.ഈ വൈദ്യുതി ഗ്രിഡിലേക്ക് നൽകി ഉപഭോക്താക്കൾക്ക് ലഭ്യമാകുന്നു. ഗ്രാവിറ്റിസിറ്റി, എനർജി വോൾട്ട് എന്നീ രണ്ട് സ്റ്റാർട്ടപ്പ് കമ്പനികളാണ് ഈ സാങ്കേതിക വിദ്യകളിലെ പ്രമുഖർ.ഇതിൽ ഗ്രാവിറ്റി സിറ്റി ഉപേക്ഷിക്കപ്പെട്ട വലിയ ഖനികളുടെ ആഴങ്ങളിൽ നിന്ന് വലിയ കോൺക്രീറ്റ് ഭാരങ്ങൾ പകൽ സമയം മുകളിലേക്ക് ഉയർത്തുന്ന അണ്ടർ ഗ്രൗണ്ട് ടെക്നോളജിയും, എനർജി വോൾട്ട് ഭുമിയിൽ സ്ഥാപിച്ച വലിയ ടവറുകളുടെ മുകളിലേക്ക് കോൺക്രീറ്റ് ബ്ലോക്കുകൾ ഉയർത്തുന്ന ടെക്നോളജിയിലും ശ്രദ്ധ കേന്ദ്രീകരിച്ചിരിക്കുന്നു.

ഏതാണ്ട് 50 വർഷമാണ് ഈ ബാറ്ററിയുടെ ആയുസ് കണക്കാക്കുന്നത്. സാങ്കേതിക വിദ്യ വളരുമ്പോൾ വൈദ്യുതി നിർമ്മിക്കുന്ന ടർബൈനുകളുടെ സാങ്കേതിക വിദ്യ പുതുക്കി വൈദ്യുതി ഉൽപ്പാദനം ഇരട്ടിയോ അതിലധികമോ ആയി വർദ്ധിപ്പിക്കാൻ അധികച്ചലവ് തുഛം എന്ന മേന്മയുമുണ്ട്. എഴുതിയത്.

#അജിത്_കളമശേരി. 14.04.2024

ഗ്രാവിറ്റി ബാറ്ററിയെക്കുറിച്ചെഴുതിയ വിശദമായ ലേഖനം ഈ ലിങ്കിൽ ക്ലിക്ക് ചെയ്ത് വായിക്കാം.

https://www.facebook.com/photo/?fbid=4860758490695935&set=a.165884893516675

#ajith_kalamassery,#gravity_battery,#solar

ബാറ്ററികളുടെ പകരക്കാർ

 ബാറ്ററികളുടെ പകരക്കാർ

 

സോളാർ പാടങ്ങൾ ഉപയോഗിച്ച് വൻ തോതിൽ താരതമ്യേന കുറഞ്ഞ ചിലവിൽ നമുക്ക് വൈദ്യുതി നിർമ്മിക്കാം. പക്ഷേ ഈ വൈദ്യുതി ഉയർന്ന ഉപഭോഗം നടക്കുന്ന രാത്രികാലങ്ങളിലേക്ക് ബാറ്ററികളിൽ സംഭരിക്കണമെങ്കിൽ സോളാർ പ്ലാൻ്റിൻ്റെ നിർമ്മാണ ചിലവ് അതി ഭീമമായി വർദ്ധിക്കും. കൂടാതെ ഈ ബാറ്ററികളുടെ വൈദ്യുത സംഭരണ ശേഷി പ്രതിവർഷം 10 ശതമാനം വരെ കുറഞ്ഞു കൊണ്ടിരിക്കും. തൻമൂലം ഏതാണ്ട് 5 മുതൽ 10 വർഷങ്ങൾക്കുള്ളിൽ ഈ ബാറ്ററി സംവിധാനം പൂർണ്ണമായി മാറ്റി വയ്ക്കേണ്ടി വരുന്നു.

തൻമൂലം വൻ ബാദ്ധ്യത സോളാർ പ്ലാൻ്റ് സ്ഥാപിക്കുന്ന കമ്പനികൾക്കും വ്യക്തികൾക്കും ഉണ്ടാകുന്നു.

പകൽ ഉൽപ്പാദിപ്പിക്കുന്ന വൈദ്യുതോർജ്ജത്തെ ബാറ്ററികൾ ഒഴിവാക്കി വേറേ ഏതെങ്കിലും മാർഗ്ഗങ്ങളിലൂടെ സംഭരിക്കാനാവുമോ എന്ന തലതിരിഞ്ഞ ആശയം സോളാർ പാനലുകൾ കണ്ടു പിടിച്ച നാളു മുതൽ പലരുടെയും തല പുകച്ചിരുന്ന വിഷയമായിരുന്നു.

ധാരാളം സാങ്കേതിക വിദ്യകൾ ഈ പുകഞ്ഞ തലകളിൽ നിന്ന് ബഹിർഗമിച്ചു.നവീന വൈദ്യുതി സംഭരണ ടെക്നോളജികൾ പൊതുജനങ്ങൾ വ്യാപകമായി ഉപയോഗിച്ചാൽ തങ്ങളുടെ കച്ചവടം പൂട്ടിപ്പോയാലോ എന്ന് കരുതിയാകണം ബാറ്ററി നിർമ്മാണ കമ്പനികളൊന്നും ഈ സാങ്കേതിക വിദ്യകളുടെ വളർച്ചക്ക് സാമ്പത്തികമായോ, സാങ്കേതികമായോ സഹായങ്ങളൊന്നും നൽകിയില്ല.

ഇപ്പോൾ ലോകമെങ്ങും കൂണുകൾ പോലെ മുളച്ചു വരുന്ന തലയിൽ ആശയമുള്ള പിള്ളാരുടെ സ്റ്റാർട്ടപ്പ് കമ്പനികൾ ഈ ആശയങ്ങളിൽ പലതും പ്രാവർത്തികമാക്കി തുടങ്ങിയിട്ടുണ്ട്. അനദിവിദൂര ഭാവിയിൽ ഇവ നമ്മുടെ നാടു മുഴുവൻ നിറഞ്ഞ് നമ്മുടെ വൈദ്യുതി പ്രതിസന്ധിക്ക് നല്ല അളവിൽ പരിഹാരമാകുമെന്ന് പ്രതീക്ഷിക്കാം..

ഈ ലേഖനം വായിക്കുന്ന ഈ വിഷയങ്ങളിൽ താൽപ്പര്യമുള്ള നിങ്ങളിൽ ചിലർ, ചെറിയ തോതിലെങ്കിലും നമ്മുടെ നാട്ടിൽ ഇത്തരം വൈദ്യുത സംഭരണ ടെക്നോളജികളിൽ പരീക്ഷണങ്ങളോ മുതൽ മുടക്കോ നടത്തി നോക്കാവുന്നതാണ്.

ഒരു കാരണവശാലും നഷ്ടസാദ്ധ്യതകളൊന്നുമുണ്ടാകില്ല. വിജയിച്ചാൽ വൻ ബിസിനസ് അവസരങ്ങൾ ഉണ്ടുതാനും.

ഗ്രാവിറ്റി ബാറ്ററിയെക്കുറിച്ചെഴുതിയ ലേഖനം ഈ ലിങ്കിൽ ക്ലിക്ക് ചെയ്ത് വായിക്കാം.

https://www.facebook.com/photo/?fbid=4860758490695935&set=a.165884893516675

കെമിക്കൽ ബാറ്ററികൾ ഒഴിവാക്കിയുള്ള പ്രകൃതി സൗഹാർദ്ധപരമായ പ്രധാനപ്പെട്ട വൈദ്യുതി സംഭരണ ടെക്നോളജികൾ.

1.ഗ്രാവിറ്റി ബാറ്ററി

2.പമ്പ്ഡ് സ്റ്റോറേജ്.

3, ഫ്ലൈ വീൽ ബാറ്ററി.

4, സാൻഡ് ബാറ്ററി.

5,വാട്ടർ ബാറ്ററി.

6, സ്പ്രിങ്ങ് ബാറ്ററി.

7, കമ്പ്രസ്ഡ് എയർ ബാറ്ററി.

8, ലിക്വിഡ് എയർ ബാറ്ററി.

9, ഐസ് ബാറ്ററി

10, മോൾട്ടൺ സാൾട്ട് ബാറ്ററി.

11. ഹൈഡ്രജൻ ബാറ്ററി,

12. നോ വാട്ടർ പമ്പ്ഡ് സ്റ്റോറേജ്.

13, പമ്പ്ഡ് എയർ വാട്ടർ ബാറ്ററി,

14, ഹീറ്റ് ബ്രിക് ബാറ്ററി.

പകൽ നേരം ഉൽപ്പാദിപ്പിക്കുന്ന സോളാർ വൈദ്യുതി വിലയേറിയ ബാറ്ററി ബാങ്കുകൾ ഉപയോഗിക്കാതെ പ്രകൃതി സൗഹാർദ്ദപരമായ ടെക്നോളജികളുടെ സംഭരിക്കാനുള്ള മാർഗ്ഗങ്ങൾ ലോകമെമ്പാടുമുള്ള ശാസ്ത്രലോകം തിരഞ്ഞ് കൊണ്ടിരിക്കുകയാണല്ലോ .

.നിലവിൽ കണ്ടെത്തിയതും, പരീക്ഷണ ഘട്ടത്തിലുള്ളതുമായ ചില റിന്യൂവബിൾ എനർജി സ്റ്റോറേജ് ടെക്നോളജികൾ പരിചയപ്പെടുത്തുന്നു.

വലിയ ലേഖനങ്ങൾ വായന ദുഷ്കരമാക്കുന്നു എന്ന് യുവജനങ്ങൾ പരാതിപ്പെടുന്നു എന്ന് ചില അഭ്യുദയകാംക്ഷികൾ പറഞ്ഞതിനാൽ എല്ലാം ക്യാപ് സൂൾ രൂപത്തിൽ വെട്ടിമുറിച്ച് എഴുതി ഒരു പരീക്ഷണം നടത്തിയിരിക്കുകയാണ്.

എഴുതിയത് അജിത് കളമശേരി.14.04.2024 എല്ലാവർക്കും വിഷു ആശംസകൾ എഴുതിയത് അജിത് കളമശേരി.14. 04.2024

ഐസികളുടെ ജാതകം വായിക്കാം

 ഐസികളുടെ ജാതകം വായിക്കാം

 അജിത് കളമശേരി

 

 

 ഇൻ്റഗ്രേറ്റഡ് സർക്യൂട്ടുകൾ എന്ന ഐസി ചിപ്പുകൾ ഇലക്ട്രോണിക്സ് ഉപകരണങ്ങളുടെ ഹൃദയഭാഗമാണല്ലോ.


ഒരു സെറ്റ് സർവ്വീസിങ്ങിനായോ, കൗതുകം കൊണ്ടോ അഴിച്ച് നോക്കിയാൽ അതിനുള്ളിൽ ഒന്നിലധികം ഐ സി ചിപ്പുകൾ കണ്ടെന്ന് വരാം.ഇവയുടെ പുറത്ത് അവയുടെ പാർട്ട് നമ്പരിന് പുറമേ പിന്നേയും ചില  ഇംഗ്ലീഷ് അക്ഷരങ്ങളിലും അക്കങ്ങളിലുമായി കുറേ വിവരങ്ങൾ എൻഗ്രേവ് ചെയ്തിരിക്കുന്നതായി കാണാം.


ഐ സി നമ്പരിന് പുറമേ അധികമായി കാണുന്ന വിവരങ്ങൾ നമ്മൾ അവഗണിക്കുകയാണ് പതിവ് .അവ കൊണ്ട് സാധാരണ ടെക്നീഷ്യൻമാർക്ക് പ്രത്യേകിച്ച് ഉപയോഗമൊന്നുമില്ല എന്നതിനാലാണ് ഈ അവഗണന.

എന്നാൽ ഐസി ചിപ്പുകളുടെ ജനനസമയം, മാതാപിതാക്കളുടെ പേര്, ജനിച്ച സ്ഥലം എന്നിവയെല്ലാം കൃതമായി നമ്മളെ അറിയിക്കുന്ന ജാതക കുറിപ്പുകളാണ് ഈ കോഡുകൾ എന്നറിയാമോ?

ഈ ചെറു ലേഖനം വായിച്ച് കഴിഞ്ഞ ശേഷം ഒരു ഐസിയെടുത്ത് പരിശോധിക്കുമ്പോൾ ഇത്ര സിമ്പിളായിരുന്നോ ഐ സി കളുടെ ജാതക പരിശോധന!..
ഇതുവരെ  എന്ത് കൊണ്ട് ഈ കോഡുകൾ ഡീകോഡ് ചെയ്യാൻ പഠിക്കാൻ ഞാൻ ശ്രമിച്ചില്ല എന്ന്  സ്വയം കരുതിപ്പോകും.

പഴയ ഓഡിയോ  സെറ്റുകളുടെ ചരിത്രം വിവരിക്കുന്ന ലേഖനങ്ങൾ ഞാൻ ഇടയ്ക്കിടെ എഴുതാറുണ്ട്. കയ്യിൽ കിട്ടുന്നവ  അഴിച്ച് പരിശോധിച്ച് അവയുടെ പഴക്കം മനസിലാക്കിയാണ് ഈ സെറ്റുകൾ ഏത് കാലഘട്ടത്തിൽ നിർമ്മിച്ചു എന്ന് ഞാൻ കൃത്യമായി പറയാറുള്ളത്.



ടേപ്പ് റിക്കോർഡറുകൾ പോലെ മോട്ടോറുകൾ ഉപയോഗിക്കുന്നവയിൽ മോട്ടോറിൻ്റെ നിർമ്മാണ തീയതി അതിന് പുറമേ  രേഖപ്പെടുത്തിയിരിക്കും. ഒറിജിനൽ മോട്ടോർ മാറിയിട്ടില്ലെങ്കിൽ നിർമ്മാണ തീയതി കണ്ടെത്താനെളുപ്പമാണ്.

 ഇതിലും എളുപ്പമായി ഇലക്ട്രോണിക് ഉപകരണങ്ങളുടെ നിർമ്മാണ വർഷം കണ്ടെത്താൻ
അവയിൽ ഐ സി കൾ ഉപയോഗിച്ചിട്ടുണ്ടെങ്കിൽ സാധിക്കും.ഇതിനായി  ഞാൻ മനസിലാക്കിയ  ഡീ കോഡിങ്ങ് ടെക്നിക്കാണ് ഇനി വിവരിക്കുന്നത്.


1970 മുതൽ 2010 വരെയാണ് തറവാട്ടിൽ പിറന്ന ജാതകവും ജനനസമയവും തറവാട്ട് പേരും, വീട്ട് പേരുമെല്ലാം രേഖപ്പെടുത്തിയ ഐ സികൾ വ്യാപകമായി ഉപയോഗത്തിലുണ്ടായിരുന്നത്.

ചൈനയിൽ നിർമ്മിച്ച ഐ സി കൾ ധാരാളമായി വിപണിയിൽ ലഭ്യമായതോടെയും, SMD ചിപ്പുകളുടെ വ്യാപനത്തോടെയും  ഈ പഴയ രീതിയിലുള്ള  ജാതക കുറിപ്പുകൾ മിക്ക ഐസികളിൽ നിന്നും അപ്രത്യക്ഷമായി.

 പാശ്ചാത്യ   കമ്പനികൾ ജാതക കുറിപ്പുകൾ SMD ചിപ്പുകളിലും അൽപ്പം ചില വ്യത്യാസങ്ങളോടെയാണെങ്കിലും ഇപ്പോഴും രേഖപ്പെടുത്തുന്നുണ്ട് എന്ന കാര്യം അഭിനന്ദനീയമാണ്.




ഐ സി യുടെ പാർട്ട് നമ്പർ രേഖപ്പെടുത്തിയത്  ഏതൊരു ടെക്നീഷ്യനും എളുപ്പം മനസിലാകും.. അത് കൂടാതെ തുടർച്ചയായ നാലക്കങ്ങൾ ഒരു ഇംഗ്ലീഷ് അക്ഷരം മുൻപിലോ പുറകിലോ  ഒപ്പം ചേർത്ത് രേഖപ്പെടുത്തിയിരിക്കുന്നത് കാണാം.

സാധാരണയായി K, A,C,Q, B എന്നെല്ലാമുള്ള അക്ഷരങ്ങളാണ് കാണാറുള്ളത് .വ്യത്യസ്തമായ അക്ഷരങ്ങളും കമ്പനി വ്യത്യാസമനുസരിച്ച് കാണാറുണ്ട്.

ഈ നാലക്കങ്ങളിൽ ആദ്യ രണ്ടക്കം നിർമ്മാണ വർഷത്തെ സൂചിപ്പിക്കുന്നു. ചിത്രം നോക്കുക ഇടത് വശം കാണുന്ന CD 4016 ഐസി അൽപ്പം വലുതാക്കി നോക്കൂ.
മലേഷ്യ എന്ന പേരിന് മുകളിലെ ലൈനിൽ S991A എന്ന ബാച്ച് നമ്പരിന് ശേഷം 9914 എന്ന് പ്രിൻ്റ് ചെയ്തിരിക്കുന്നത് കാണാം. ഇതിൽ 99 എന്നത് 1999 ൽ നിർമ്മിക്കപ്പെട്ടത് എന്നതിൻ്റെ ചുരുക്കെഴുത്താണ്. 14 എന്നത് 99 ലെ പതിനാലാമത്തെ ആഴ്ചയിൽ നിർമ്മിക്കപ്പെട്ടു എന്നും മനസിലാക്കണം. അതായത് 1999ലെ ഏപ്രിൽ മാസത്തിലെ ആദ്യ ആഴ്ചയിലെ ഏതോ ദിവസം നിർമ്മിക്കപ്പെട്ടു എന്ന് മനസിലാക്കാം.

വേറൊരു ഉദാഹരണം നോക്കാം :ചിത്രത്തിലെ GI എന്ന് വലിയ അക്ഷരത്തിൽ രേഖപ്പെടുത്തിയിരിക്കുന്ന ഐസി നോക്കുക. അതിൻ്റെ മൂന്നാമത്തെ ലൈനിൽ 8332 CCA എന്ന് കാണാം. ഇതിൽ 83 എന്നത് 1983 നെയും 32 എന്നത് 83 ലെ 32 മത്തെ ആഴ്ച വരുന്ന  ആഗസ്റ്റ് മാസത്തിലെ ഏതോ ഒരു ദിവസം നിർമ്മിക്കപ്പെട്ടു എന്നും മനസിലാക്കാം! CCA എന്നത്  ബാച്ച് നമ്പരാണ്.അത് നമ്മൾ ഇപ്പോൾ അറിഞ്ഞിട്ട് വലിയ കാര്യമൊന്നുമില്ലല്ലോ.

ചില ഐസി നിർമ്മാതാക്കൾ വർഷത്തിൻ്റെ രണ്ടക്കം ആഴ്ചക്ക് ശേഷം എഴുതുന്നതായും കണ്ട് വരാറുണ്ട്.

അതായത് YY WW എന്ന ഫോർമാറ്റിന് പകരം, WW YY എന്ന് രേഖപ്പെടുത്തും. YY എന്നാൽ വർഷത്തിൻ്റെ ലാസ്റ്റ് രണ്ട് സംഖ്യ, WW എന്നത് വീക്ക് അഥവാ ആഴ്ച,.

ഹിറ്റാച്ചി പോലുള്ള ചില കമ്പനികൾ വർഷം സൂചിപ്പിക്കാൻ ഇംഗ്ലീഷ് അക്ഷരങ്ങളും, ചിലപ്പോൾ ഒറ്റ അക്കം മാത്രമായും ഉപയോഗിക്കാറുണ്ട്. അത് അവരുടെ ഡാറ്റാഷീറ്റിൽ രേഖപ്പെടുത്തിയിരിക്കും.

എന്നാലും ഈ YY WW കോഡ് ലോകത്തിലെ ഭൂരിപക്ഷം ചിപ്പ് നിർമ്മാണ  കമ്പനികളും പിൻതുടരുന്നതിനാൽ നമുക്ക് ഇവ ഐസിയിൽ എവിടെയെങ്കിലും കാണാം. ചിലപ്പോൾ  ഐസി ബോർഡിൽ നിന്ന് ഊരി നോക്കേണ്ടി വരും ,അടിഭാഗത്തായിരിക്കും ചിലരുടെ പ്രിൻ്റിങ്ങ്!.

7652 എന്നാൽ  1976 ലെഡിസംബർ മാസത്തിലെ അവസാന ആഴ്ചയിലെ ഏതോ ഒരു ദിവസം നിർമ്മിക്കപ്പെട്ടത്( 52 മത്തെ ആഴ്ചയിൽ നിർമ്മിക്കപ്പെട്ടത് ) , 8332 എന്നാൽ 1983 ലെ മുപ്പത്തിരണ്ടാം ആഴ്ച നിർമ്മാണം.
9901 എന്നാൽ 1999ലെ ഒന്നാമത്തെ അഴ്ച. 0115 എന്നത് 2001 ലെ 15 ആം ആഴ്ച നിർമ്മിച്ചത്.0909 എന്നാൽ 2009 ലെ ഒമ്പതാമത്തെ ആഴ്ച നിർമ്മിക്കപ്പെട്ടത്.

 ഒരു വർഷം എന്നത് 52 ആഴ്ചകളാണ് ഇതിലും വലിയ അക്കം വന്നാൽ അത് വേറെ എന്തോ ആണെന്ന് കരുതണം. ശരിയായ ലൈൻ വേറെ ഉണ്ടാകും.

ഒരു പഴയ സെറ്റ് കിട്ടിയാൽ അത് അഴിച്ച് പണിതിട്ടില്ലെങ്കിൽ  അതിലെ മിക്കവാറും ഐസികളെല്ലാം ഒരേ വർഷം നിർമ്മിക്കപ്പെട്ടതായിരിക്കുമെന്ന് കാണാം ചിത്രത്തിലെ PCB യിൽ കാണുന്ന ഐസികൾ നോക്കൂ. എല്ലാം 1984 നിർമ്മിതികൾ ആഴ്ചയിൽ മാത്രം വ്യത്യാസമുണ്ട്.

ഐ സി ചിപ്പുകളുടെ ജാതകത്തിൽ സാങ്കേതികമായി അൽപ്പം  കൗതുകം കൂടുതലുള്ളവർ അറിയാനാഗ്രഹിക്കുന്ന ചില കാര്യങ്ങൾ മാത്രമേ ഇവിടെ പറഞ്ഞിട്ടുള്ളൂ.

ഫിലിപ്സ് ഐ സി കളുടെ കാര്യത്തിൽ ചെറിയ ഒരു അപ്ഡേറ്റ് ഉണ്ട്.  സാധാരണ കോഡിങ്ങിന് പുറമേ ഫിലിപ്സ് നിർമ്മാണ വർഷം  YY ക്ക് ശേഷം മാസം M ആഴ്ച W എന്ന ക്രമത്തിലാണ് ചില രാജ്യങ്ങളിലെ പ്രെഡക്ഷൻ യൂണിറ്റുകളിൽ നിന്ന് പുറത്തിറക്കിയിരുന്നത്.  മറ്റ് ചില  യൂണിറ്റുകൾ വർഷം സൂചിപ്പിക്കാൻ ഇംഗ്ലീഷ് അക്ഷരങ്ങളും ഉപയോഗിച്ചിരുന്നു. ഫിലിപ്പ്സ് ലൈസൻസ് കൊടുത്ത് അതിൻ പ്രകാരം ഐ സി കൾ  നിർമ്മിച്ചിരുന്ന സിംഗപ്പൂർ, മലേഷ്യ,തെയ് വാൻ ,യൂണിറ്റുകൾ വിവിധ രീതികളാണ് നമ്പറിങ്ങ് കോഡിനായി അനുവർത്തിച്ചിരുന്നത്. ഇവയുടെ കൃത്യമായ ഐഡൻ്റിഫിക്കേഷൻ ഡാറ്റാഷീറ്റുകളിൽ മാത്രമേ കാണൂ.

ഓരോ ഐസിയും ഏത് തരത്തിൽ പെട്ടതാണ്, അവ ഏത് കമ്പനി നിർമ്മിച്ചു, ഏത് കമ്പനിക്ക് വേണ്ടി നിർമ്മിച്ചു, എന്നെല്ലാമുള്ള അധികവിവരങ്ങൾ വായിച്ചെടുക്കാനുള്ള മാർഗ്ഗങ്ങൾ  കൂടുതൽ ഗഹനമായ മറ്റൊരു ലേഖനത്തിനുള്ള വകുപ്പാണ് ആയതിനാൽ അവ ഇവിടെ  ഒഴിവാക്കുന്നു. എഴുതിയത് അജിത് കളമശേരി,31.01.2024 #ajithkalamassery,

സ്റ്റീരിയോ സംഗീതത്തിൻ്റെ പിതാവ് അലൻ ബ്ലൂംലിൻ

 സ്റ്റീരിയോ സംഗീതത്തിൻ്റെ പിതാവ്

 അലൻ ബ്ലൂംലിൻ.

 എഴുതിയത് അജിത് കളമശേരി

അലൻ ബ്ലൂംലിൻ
സ്റ്റീരിയോ സംഗീതത്തിൻ്റെ പിതാവ്.

കാലത്തിൻ്റെ കുത്തൊഴുക്കിൽ ഓർക്കേണ്ടവർ പോലും ഓർക്കാതെ വിസ്മൃതിയിലാണ്ട് പോയ ധാരാളം മനുഷ്യ ജൻമങ്ങളുണ്ട്. അതിലൊരാളാണ് അലൻ ഡോവർ ബ്ലൂം ലിൻ എന്ന സംഗീത സ്നേഹിയായ  സൗണ്ട് എഞ്ചിനീയർ.

 അദ്ദേഹമില്ലായിരുന്നെങ്കിൽ നമ്മുടെ  ലോകം എത്ര വിരസമായേനെ എന്ന് ഈ കഥ വായിക്കുമ്പോൾ നമുക്ക് മനസിലാകും.


ലണ്ടനിലെ ഹാംസ്റ്റഡിൽ  കുത്തിത്തിരുപ്പിൽ തൽപ്പരനായ കുട്ടിയുണ്ടായിരുന്നു. അലൻ ഡോവർ ബ്ലൂം ലിൻ എന്നായിരുന്നു അവൻ്റെ പേര്.

കുട്ടികളുടെ കുത്തിത്തിരുപ്പ് ഒരു നല്ല കാര്യമായി  ഇന്നത്തെപ്പോലെ തന്നെ അന്നും രക്ഷിതാക്കൾ കരുതിയിരുന്നില്ല.

അതിനായി ഇറങ്ങിപ്പുറപ്പെടുന്നവർ ധാരാളം അടിയും, ഇടിയും, ചീത്തയുമൊക്കെ ഏറ്റ് വാങ്ങേണ്ടി വരും!

ഈ താഡനങ്ങളെല്ലാം ഏറ്റ് വാങ്ങിയാലും പിന്നേയും പഴയ ഒരു സ്ക്രൂ ഡ്രൈവറോ, കുടക്കമ്പിയോ സംഘടിപ്പിച്ച് കയ്യിൽ കിട്ടുന്ന എന്ത് ഉപകരണങ്ങളും  കുത്തി തിരിച്ച് തുറന്ന് അകത്ത് ആരെല്ലാമാണ് ഇരിക്കുന്നതെന്ന് നോക്കി കൊണ്ടേയിരിക്കും വികൃതികളായ ഈ കുത്തിത്തിരുപ്പുകാർ !.

വീട്ടിൽ പൊളിച്ച് പണിയാൻ പറ്റിയ ഉപകരണങ്ങൾ ഒന്നുമില്ലാതിരുന്നതിനാൽ അയൽവക്കത്തെ വീടുകളിൽ നിന്ന് ഉപയോഗശൂന്യമായി കളയുന്ന അക്രി സാധനങ്ങളേ നമ്മുടെ ബ്ലുംലിന്ന് പണി പഠിക്കാനായി ലഭ്യമായിരുന്നുള്ളൂ.

അങ്ങനെയിരിക്കെ നമ്മുടെ ഏഴുവയസുകാരൻ മെക്കാനിക്കിന് ഏതോ വീട്ടുകാർ കേടായതിനാൽ കളഞ്ഞ ഒരു ഇലക്ട്രിക് ഡോർ ബെൽ കിട്ടി.

ബ്ലും ലിൻ  അൽപ്പനേരം കൊണ്ട് അത് പൊളിച്ച് പണിത്  ശരിയാക്കിയെടുത്തു. ബ്ലൂം ലിൻ ഡോർബൽ ശരിയാക്കിയ വിവരം കേട്ടറിഞ്ഞ്  അയൽവക്കം കാരിൽ പലരും ബല്ലുകൾ റിപ്പയർ ചെയ്യാൻ ആ ഏഴ് വയസുകാരനെ തേടിയെത്താൻ തുടങ്ങി.

തൊട്ടടുത്ത സ്ട്രീറ്റിൽ ഒരു ചെറുകിട ഇലക്ട്രിക് ഡോർ ബൽ നിർമ്മാതാവ് ഉണ്ടായിരുന്നു.  അദ്ദേഹം ഈ കുട്ടിയെപ്പറ്റി കേട്ടറിഞ്ഞു. ബ്ലൂം ലിന്നിനെ  തിരക്കിപ്പിടിച്ച് തൻ്റെ പണിശാലയിലേക്ക് കൊണ്ടുപോയ ആ ചെറുകിട നിർമ്മാതാവ് താൻ ഉണ്ടാക്കി വിറ്റതിൽ കേടായി തിരികെയെത്തിയ ഡോർബല്ലുകൾ  സമയം കിട്ടുന്നതനുസരിച്ച് നന്നാക്കിത്തരാമോ എന്ന് അവനോട്  ചോദിച്ചു.

അന്നത്തെ ഇലക്ട്രിക് ഡോർ ബല്ലുകൾക്ക്  ജന്മനാൽത്തന്നെ ഒരു തകരാറുണ്ടായിരുന്നു. ഒരു മിനിറ്റിൽ കൂടുതൽ സ്വിച്ച് ഞെക്കിപ്പിടിച്ചാൽ അതിൻ്റെ കോയിൽ കത്തിപ്പോകും. നന്നാക്കുന്നതിന് പുതിയത് വാങ്ങുന്നതിനേക്കാൾ കാശാകുമെന്നതിനാൽ മിക്കവരും അതങ്ങ് ഉപേക്ഷിക്കും.

 ഫാക്ടറി ഉടമയുടെ അപേക്ഷ സ്വീകരിച്ച്  സന്തോഷപൂർവ്വം ആ പണി ഏറ്റെടുത്ത ബ്ലൂം ലിൻ  എത്ര നേരം അമർത്തിപ്പിടിച്ചാലും കോയിൽ കത്തിപ്പോകാത്ത വിധം പരമ്പരാഗത ഇലക്ട്രിക്  ഡോർബല്ലുകളുടെ ഡിസൈനിൽ ചെറിയ ഒരു മാറ്റം വരുത്തുകയാണ് ആദ്യം ചെയ്തത്. സ്വിച്ച്  അമർത്തി പിടിച്ചാൽ ഏതാനും സെക്കൻഡ് കഴിയുമ്പോൾ ഒരു തകിട് ചൂടായി ബല്ലിൻ്റെ  വൈദ്യുതി ബന്ധം ഓട്ടോമാറ്റിക്കായി ഡിസ്കണക്റ്റാകും ഏതാനും സെക്കൻഡുകൾക്കകം  തകിട് തണുക്കുമ്പോൾ വീണ്ടും കറണ്ട് കിട്ടും ബല്ലടിക്കും.എത്ര നേരം ഞെക്കിപ്പിടിച്ചാലും കോയിൽ കത്തില്ല, കൂടാതെ കാതിനിമ്പം നൽകുന്ന ശബ്ദവും.

 ഇന്നത്തെ ഇലക്ട്രിക്  തേപ്പ് പെട്ടികളിൽ ചൂട് നിയന്ത്രിക്കാൻ  ഉപയോഗിക്കുന്ന തെർമ്മോ സ്റ്റാറ്റിൻ്റെ ആദ്യ രൂപമായിരുന്നു 1910 ൽ ബ്ലും ലിൻ തൻ്റെ ഏഴാം വയസിൽ കണ്ടെത്തിയത്.

ബ്ലൂം ലിൻ മോഡിഫിക്കേഷൻ ചെയ്ത ബല്ലുകൾ വിപണിയിൽ താരമായി. സന്തോഷ സൂചകമായി ആ ഇലക്ട്രിക് ബൽ നിർമ്മാതാവ് ബ്ലൂം ലിന്നിൻ്റെ പിതാവിനെ വീട്ടിലെത്തി കണ്ട് നന്ദി പറയുകയും കുറച്ച് പണം പ്രതിഫലമായി അദ്ദേഹത്തെ ഏൽപ്പിക്കുകയും ചെയ്തു.

പണത്തേക്കാളുപരി ബ്ലൂം ലിന്നിനെ സന്തോഷിപ്പിച്ചത് ആ ഫാക്ടറി ഉടമ തൻ്റെ കമ്പനി ലറ്റർ ഹെഡിൽ ടൈപ്പ് ചെയ്ത് അവന് നൽകിയ പ്രശംസാപത്രമാണ്. അലൻ ഡോവർ ബ്ലൂം ലിൻ. ഇലക്ട്രിക്കൽ  എഞ്ചിനീയർ എന്നായിരുന്നു ആ  ഏഴ് വയസുകാരനെ പ്രശംസാപത്രത്തിൽ വിശേഷിപ്പിച്ചിരുന്നത്.

തൻ്റെ കരിയർ രൂപപ്പെടുത്തുന്നതിൽ ആ പ്രശംസാപത്രത്തിന് വളരെയധികം പ്രാധാന്യമുണ്ടായിരുന്നുവെന്ന് ബ്ലൂം ലിൻ പിന്നീട് പലപ്പോഴും പറഞ്ഞിട്ടുണ്ട്. ഒരു നല്ല കാര്യം ആര് ചെയ്താലും  വലിയവനെന്നോ ചെറിയവനെന്നോ നോക്കാതെ പ്രശംസിക്കാൻ പിശുക്ക് കാണിക്കല്ലേ ഭാവിയിൽ അവരിലൂടെയാകും ചരിത്രത്തിൽ നമ്മുടെ പേര് പതിയുന്നത്.
സ്കൂൾ -കോളേജ് പഠനം പൂർത്തിയാക്കിയ അലൻ ബ്ലൂം ലിൻ വീട്ടിലെ സാമ്പത്തിക നില അത്ര മെച്ചമല്ലാതിരുന്നതിനാൽ 1924ൽ  തൻ്റെ ഇരുപത്തിയൊന്നാം വയസിൽ തനിക്ക് താൽപ്പര്യമുള്ള ഒരു ജോലി കണ്ടെത്തി അതിൽ പ്രവേശിച്ചു. അന്നത്തെ പ്രശസ്തമായ ടെലിഫോൺ അനുബന്ധ ഉപകരണ നിർമ്മാതാക്കളായ  വെസ്റ്റേൺ ഇലക്ട്രിക് കമ്പനിയുടെ ഫാക്ടറിയിലായിരുന്നു ജോലി.


ജോലിയിൽ ചേർന്ന വർഷം തന്നെ ഒരു സുപ്രധാന കണ്ട് പിടുത്തം ബ്ലൂം ലിൻ നടത്തി. ഹൈ ഫ്രീക്വൻസിയിൽ ഉപയോഗിക്കുന്ന റസിസ്റ്റൻസുകളുടെ ഇൻലൈൻ മെഷർമെൻ്റ് നടത്തുന്നതിനുള്ള സംവിധാനമാണ് അദ്ദേഹം കണ്ടെത്തിയത്.ഇതിന് IEE യുടെ 1924 ലെ  ഏറ്റവും മികച്ച കണ്ട് പിടുത്തത്തിനുള്ള അവാർഡ് ലഭിച്ചു.

ഒരു സംഗീതപ്രേമിയായ ബ്ലൂം ലിൻ കമ്പനി ഗവേഷണങ്ങൾക്കൊപ്പം തൻ്റെ സ്വന്തം ഗവേഷണവും തുടർന്നു പോന്നു.1924 ൽ തന്നെ മനുഷ്യരുടെ ചെവികളുടെ ഫ്രീക്വൻസിയും, ആംപ്ലിറ്റ്യൂഡും അളക്കുന്നതിനുള്ള ഉപകരണം വികസിപ്പിച്ചെടുത്ത് പേറ്റെൻ്റ് ചെയ്തു.

തുടർന്ന് ലാബുകളിൽ ഉപയോഗിക്കുന്ന പ്രിസിഷൻ മൂവിങ്ങ്കോയിൽ മൾട്ടി മീറ്ററുകൾ ഓവർ ലോഡ് ആകാതിരിക്കാനുള്ള വെയിങ്ങ് ബ്രിഡ്ജ് നെറ്റ് വർക്ക് സംവിധാനം വികസിപ്പിച്ചെടുത്തു. വളരെ പ്രാധാന്യമേറിയ ഒരു കണ്ടുപിടുത്തമായിരുന്നു ഇത്.

1925ൽ ഒരു ടെലിഫോൺ കമ്പിയിലൂടെ നൂറ് കണക്കിന് സന്ദേശങ്ങൾ ക്രോസ് ടാക്കില്ലാതെ കടത്തിവിടാനുള്ള ലോഡിങ്ങ് കോയിൽ സംവിധാനം വികസിപ്പിച്ചെടുത്തു.


അത് വരെ ഒരു ഫോണിന് ഒരു വയർ എന്ന നിലയിലായിരുന്നു ടെലിഫോൺ എക്സേ ഞ്ചുകൾ തമ്മിൽ  കണക്ഷൻ ബന്ധിപ്പിച്ചിരുന്നത് .ഈ കണ്ടെത്തലോടെ അത് 100 മുതൽ 250 വയറുകൾക്ക് വരെ പകരം ഒറ്റ വയർ എന്ന നിലയിലേക്ക് മാറി.ഇതോടെ വൻ തോതിൽ പ്രവർത്തന ചിലവ് കുറഞ്ഞു.. ടെലിഫോൺ വ്യാപകമായി.

1929ൽ ബ്ലൂംലിൻ വെസ്റ്റേൺ ഇലക്ട്രിക് വിട്ടു. തൻ്റെ ഇഷ്ടപ്രൊഫഷനായ സൗണ്ട് എഞ്ചിനീയറിങ്ങിലേക്ക് വഴി മാറി. അക്കാലത്തെ ലോക പ്രശസ്തമായ സംഗീത നിർമ്മാണ വിതരണ കമ്പനിയായ  കൊളംമ്പിയ ഗ്രാമഫോൺ റിക്കോഡ് കമ്പനിയിൽ ചേർന്നു.

ബ്ലും ലിന്നിൻ്റെ സൗണ്ട് എഞ്ചിനീയറിങ്ങിലെ കഴിവുകൾ തിരിച്ചറിഞ്ഞ കൊളംബിയ റിക്കോഡ് കമ്പനി GM ഐസക്ക് ഷൂൺബർഗ്  അദ്ദേഹത്തെ വെസ്റ്റേൺ ഇലക്ട്രിക്കിൽ നിന്ന് അടിച്ച് മാറ്റുകയായിരുന്നു.!


അക്കാലത്ത് ഗ്രാമഫോൺ റിക്കോഡുകൾ നിർമ്മിക്കുന്നതിൻ്റെ ടെക്നോളജിയുടെ കുത്തകാവകാശം എഡിസൺ ബെൽ കമ്പനിക്കായിരുന്നു. ലോകത്ത് എവിടെ ഗ്രാമഫോൺ റിക്കോഡുകൾ നിർമ്മിച്ചാലും ആ ടെക്നോളജിയുടെ റോയൽറ്റി പേറ്റെൻ്റ് ഹോൾഡറായ എഡിസൻ്റെ കമ്പനിക്ക് കൊടുക്കണം.

ലോകത്തിലെ അന്നത്തെ ഏറ്റവും വലിയ ഗ്രാമഫോൺ റിക്കോഡ് നിർമ്മാതാക്കളായ കൊളംമ്പിയ വൻ തുകയാണ് ഓരോ മാസവും റോയൽറ്റിയായി എഡിസണ് നൽകിയിരുന്നത്.

 കൊളംമ്പിയ റിക്കോഡിൽ ജോലിക്ക് ചേർന്ന ബ്ലൂം ലിൻ ആദ്യമായി ചെയ്തത് ഗ്രാമഫോൺ റിക്കോഡുകൾ നിർമ്മിക്കുന്നതിനുള്ള പുതിയ ടെക്നോളജി വികസിപ്പിക്കുകയാണ്.

 ഗ്രാമഫോൺ റിക്കോഡുകളുടെ മാസ്റ്റർ കോപ്പി പഞ്ച് ചെയ്യുന്നതിനുള്ള മൂവിങ്ങ്കോയിൽ റോട്ടറി കട്ടിങ്ങ്  ലേത്ത് എന്ന നവീന സംവിധാനം ഇതിനായി അദ്ദേഹം കണ്ടു പിടിച്ചു.

ഇതോടെ കൊളംമ്പിയ റിക്കോഡ്സ് എഡിസണ് വർഷം തോറും നൽകിയിരുന്ന ലക്ഷക്കണക്കിന് ഡോളർ ലാഭിക്കാനായി. കൂടാതെ എഡിസൻ്റെ ടെക്നോളജിയേക്കാൾ വളരെയധികം മെച്ചപ്പെട്ട റോട്ടറി ലേത്ത് ടെക്നോളജി റിക്കോഡുകളുടെ സൗണ്ട് ക്വാളിറ്റി പലമടങ്ങ് മെച്ചപ്പെടുത്തി.

ഇതോടെ ഗ്രാമഫോൺ റിക്കോഡുകളുടെ ഉപഞ്ജാതാവായ എഡിസൻ്റെ ടെക്നോളജി തന്നെ കാലഹരണപ്പെട്ടു പോയി!.



തികഞ്ഞ ഒരു സിനിമാ ഭ്രാന്തനായിരുന്നു ബ്ലൂം ലിൻ അദ്ദേഹത്തിന് തികച്ചും അനുയോജ്യയായ ഒരു ഭാര്യയും ഡോറിൻ ലിൻ.. ഇവർ രണ്ടു പേരും പുതുതായി ഇറങ്ങുന്ന ഓരോ സിനിമയും എന്ത് തിരക്കിട്ട പരിപാടി ഉണ്ടെങ്കിലും അത് മാറ്റി വച്ച് റിലീസ് ദിവസം തന്നെ കാണുന്ന ശീലമുള്ളവരുമായിരുന്നു.

1930 കളിലെ ഒരു വെള്ളിയാഴ്ച MGM കോർപ്പറേഷൻ്റെ ബിഗ് ബഡ്ജറ്റ് മൂവി... 'ബിഗ് ഹൗസ്' റീജൻ്റ് തീയേറ്ററിൽ റിലീസായിരുന്നു. ഫസ്റ്റ് ഷോ കാണാൻ പതിവ് പോലെ ബ്ലൂം ലിന്നും ഭാര്യയും എത്തി.

സിനിമാ അടിപൊളിയായിരുന്നു. ഇടവേളയിൽ ഭാര്യക്കൊരു സംശയം എന്ത് കൊണ്ട് ഇടത്ത് വശത്ത് നിന്ന് വലത്തേക്ക് പോകുന്ന കുതിരകളുടെ ശബ്ദം നടുക്കുള്ള ഒരു സ്പീക്കറിൽ നിന്ന് മാത്രം കേൾക്കുന്നു?. ഇടത് വശം നിന്ന് സംസാരിക്കുന്ന നായികയുടെയും, വലത് വശം നിൽക്കുന്ന നായകൻ്റെയും ശബ്ദം അവർ നിൽക്കുന്ന സൈഡിൽ നിന്ന്  തന്നെ കേട്ടാൽ നല്ല ഒർജിനാലിറ്റി തോന്നില്ലേ?


ചോദ്യം അദ്ദേഹത്തിന് വളരെ ഇഷ്ടപ്പെട്ടു.ബ്ലൂം ലിന്നിൻ്റെ ശ്രദ്ധ സിനിമാ കാണുന്നതിൽ നിന്ന് പോയി! സിനിമയിലെ ശബ്ദത്തിന് എങ്ങനെ ഒറിജിനാലിറ്റി കൊണ്ടുവരാമെന്നതിൽ മാത്രമായിരുന്നു എന്നതായി അദ്ദേഹത്തിൻ്റെ ആലോചന.
ഒരാഴ്ച പിന്നിട്ടില്ല അതിന് മുന്നേ അദ്ദേഹം ലോകത്തിലെ ആദ്യ സ്റ്റീരിയോ ഫോണിക് സൗണ്ട് സിസ്റ്റത്തിൻ്റെ ബേസിക് ഡിസൈൻ തയ്യാറാക്കി.

വാക്കിങ്ങ് ആൻഡ് ടോക്കിങ്ങ് എന്ന പേരിൽ വെറും  ഒന്നര മിനിറ്റ് മാത്രം ദൈർഘ്യമുള്ള ശബ്ദചിത്രം സ്റ്റീരിയോ  പരീക്ഷണങ്ങൾക്കായി അദ്ദേഹം ഷൂട്ട് ചെയ്തു.. ഇത് യൂട്യൂബിൽ ലഭ്യമാണ്.തുടർന്ന് ട്രയിൻസ് അറ്റ് ഹെയ്സ് എന്ന കൂടുതൽ മെച്ചപ്പെട്ട സ്റ്റീരിയോ ഇഫക്റ്റ് ഉള്ള ലഘുചിത്രവും അദ്ദേഹം ഷൂട്ട് ചെയ്തു.

1931 ൽ തൻ്റെ ഇരുപത്തി ഏഴാം വയസിൽ പേറ്റെൻ്റ് നമ്പർ 394325 ആയി ലോകത്തിലെ ആദ്യ സ്റ്റീരിയോ ഫോണിക് സൗണ്ട് സംബന്ധമായ പേറ്റെൻ്റ് അലൻ ഡോവർ ബ്ലൂം ലിൻ സ്വന്തമാക്കി.. ഇതുകൊണ്ടും നിറുത്താതെ വെറും രണ്ട് വർഷം കൊണ്ട് തുടർച്ചയായി 71 പേറ്റെൻ്റുകളാണ് സ്റ്റീരിയോ ഫോണിക്  സൗണ്ട് സിസ്റ്റം സംബന്ധമായി അദ്ദേഹം കരസ്ഥമാക്കിയത് ..

വിനൈൽ റിക്കോഡിൻ്റെ ഒറ്റ ഗ്രൂവിൽ തന്നെ ലഫ്റ്റ് ചാനലും, റൈറ്റ് ചാനലും പഞ്ച് ചെയ്യുന്ന അത് വരെ ആരും ചിന്തിക്കുക പോലും ചെയ്യാത്ത  ബ്ലൂം ലിന്നിൻ്റെ ടെക്നോളജി കണ്ട് അന്നത്തെ വമ്പൻ ഇലക്ട്രോണിക്സ് എഞ്ചിനീയർമാരുടെ തല പോലും പെരുത്തു പോയി !

നാമിന്ന് ആസ്വദിക്കുന്ന സ്റ്റീരിയോ സൗണ്ട് സിസ്റ്റം സംബന്ധമായ എല്ലാ കണ്ടുപിടുത്തങ്ങൾക്ക് പിന്നിലും അലൻ ബ്ലൂം ലിൻ എന്ന മഹാനായ സൗണ്ട് എഞ്ചിനീയറാണ്.


സ്റ്റീരിയോ വിനൈൽ റിക്കോഡ്
സ്റ്റീരിയോ മൈക്രോഫോൺ
സ്റ്റീരിയോ ആംപ്ലിഫയർ
ഹൈ ഫിഡിലിറ്റി ഹൈ എൻഡ് ആംപ്ലിഫയർ
സ്റ്റീരിയോ സറൗണ്ട്  സൗണ്ട് സിസ്റ്റം
നെഗറ്റീവ് ഫീഡ്ബാക്ക് ഇൻ ആംപ്ലിഫയർ.
സ്പീക്കറുകളും, മൈക്രോഫോണുകളും തൊട്ടടുത്ത് ചേർന്നിരുന്നാലും സ്റ്റീരിയോ ഇഫക്റ്റ് നന്നായി ലഭ്യമാക്കുന്ന ആംബിയൻസ് സ്റ്റീരിയോ.
മൾട്ടി ചാനൽ റിക്കോഡിങ്ങ്
റിബൺ മൈക്രോഫോൺ
സ്പ്രിങ്ങ് ബാലൻസ് മൈക്രോഫോൺ
സ്റ്റീരിയോ ടെലിവിഷൻ സൗണ്ട്
ട്രാൻസിസ്റ്ററുകളുടെ കണ്ട് പിടുത്തത്തിലേക്ക് നയിച്ച വാക്വം ട്യൂബുകൾ ഉപയോഗിച്ചുള്ള ഡിഫറൻഷ്യൽ ആംപ്ലിഫയർ. വാക്വം ട്യൂബുകൾ ഉപയോഗിച്ചുള്ള ഓപ്പറേഷണൽ ആംപ്ലിഫയർ.സൗണ്ട് റിക്കോഡിങ്ങിൻ്റെ ക്വാളിറ്റി കൂട്ടാനുള്ള ബയാസിങ്ങ് ഓസിലേറ്റർ.

സ്റ്റീരിയോ ആംപ്ലിഫയറുകളുടെ ഹമ്മിങ്ങ്‌ സൗണ്ട് ,അപശബ്ദങ്ങൾ മുതലായവ ഒഴിവാക്കുന്നതിനുള്ള ഗ്രൗണ്ട് ലൂപ്പ് എർത്തിങ്ങ് ,ലോങ്ങ് ടെയിൽ പെയർ, അൾട്രാ ലീനിയർ ആംപ്ലിഫയർ ,സ്റ്റീരിയോ സൗണ്ട് ലൈവായി റിക്കോഡ് ചെയ്യുമ്പോൾ ഇടവും വലവും മാറിപ്പോകാതെ പുനരാവിഷ്ക്കരിക്കാനുള്ള ഷഫിൾ ട്രാക്കിങ്ങ് - തുടങ്ങി  സ്റ്റീരിയോ  സൗണ്ടുമായി ബന്ധപ്പെട്ട എല്ലാ ടെക്നോളജികളും അലൻ ബ്ലൂം ലിൻ കണ്ട് പിടിച്ചതാണ്.


രണ്ടാം ലോക മഹായുദ്ധകാലത്ത് അദ്ദേഹം ജോലി ചെയ്തിരുന്ന കമ്പനി സൈന്യം ഏറ്റെടുക്കുകയും എഞ്ചിനീയർമാർ ഉൾപ്പടെ  എല്ലാവരും യുദ്ധോപകരണങ്ങളുടെ കണ്ടുപിടുത്തങ്ങൾക്കായി നിയോഗിക്കപ്പെടുകയും ചെയ്തു.


അവിടെയും തൻ്റെ വ്യക്തിമുദ്ര ബ്ലും ലിൻ പതിപ്പിച്ചു.  100 കണക്കിന് കിലോമീറ്ററുകൾ അകലെ നിന്ന് വരുന്ന മിസൈലുകളെയും കണ്ടെത്തുന്ന കുറ്റമറ്റ ഒരു മിസൈൽ നിരീക്ഷണ റഡാർ സിസ്റ്റം അദ്ദേഹം വികസിപ്പിച്ചു.

കൂടാതെ വിമാനത്തിൽ നിന്നും വിക്ഷേപിക്കുന്ന എയർ ടു എയർ ,എയർ ടു സർഫസ് മിസൈലുകളുടെ  കൺട്രോൾ ആൻഡ് ട്രാക്കിങ്ങ് സിസ്റ്റവും അദ്ദേഹം കണ്ടു പിടിച്ചു.

1942 ജൂൺ മാസം ഏഴാം തീയതി  വിമാനത്തിൽ നിന്നും വിക്ഷേപിക്കുന്ന ഒരു മിസൈൽ പരീക്ഷിക്കുന്നതിനായി യുദ്ധവിമാനത്തിൽ കയറിപ്പോയ അദ്ദേഹം ആ വിമാനം ശത്രുക്കളുടെ ആക്രമണത്തിൽ തകർന്ന് കൊല്ലപ്പെട്ടു.

വെറും 38 വർഷം മാത്രം ഈ ലോകത്ത്‌ ജീവിച്ചിരുന്ന അദ്ദേഹം  സിനിമ, ടെലിവിഷൻ, റേഡിയോ, മേഖലകളിൽ  സ്റ്റീരിയോ ഫോണിക് സൗണ്ടുമായി ബന്ധപ്പെട്ട് നാമിന്ന് ഉപയോഗിക്കുന്ന 71 ഓളം പ്രധാന കണ്ടുപിടുത്തങ്ങളുടെയും പിതാവാണ്. കൂടാതെ ടെലിവിഷൻ ക്യാമറ, ടെലിവിഷൻ പിക്ചർ ട്യൂബ്, ( ഇവ രണ്ടും കണ്ടു പിടിച്ചത് ബ്ലൂം ലിൻ അല്ല. അവയെ ആധുനികവൽക്കരിക്കുകയാണ് അദ്ദേഹം ചെയ്തത്. )ഹൈവോൾട്ടേജ് സിഗ്നൽ ട്രാൻസ്മിഷൻ, പിക്ചർ ട്യൂബുകളിലെ ഗ്രാഫൈറ്റ് കോട്ടിങ്ങ് തുടങ്ങി 128 മറ്റ് കണ്ടുപിടുത്തങ്ങളും നടത്തിയിട്ടുണ്ട്.


ആംപ്ലിഫയറുകൾ നിർമ്മിക്കുകയും, ഉപയോഗിക്കുകയും ചെയ്യുന്ന ഓരോ വ്യക്തിയും മറന്ന് പോകാതെ ഓർത്തിരിക്കേണ്ട ഒരു പേരാണ് അലൻ ഡോവർ ബ്ലൂം ലിന്നിൻ്റേത്.

 നോബൽ സമ്മാനമുൾപ്പടെ യാതൊരു അംഗീകാരവും ലഭിക്കാതെ  വിസ്മൃതിയിലാണ്ട് പോയ അദ്ദേഹത്തോടുള്ള പ്രായശ്ചിത്തമായി ലോകത്തിലെ സൗണ്ട് & ഇലക്ട്രോണിക്സ് എഞ്ചിനീയർമാരുടെ കൂട്ടായ്മയായ ഓഡിയോ എഞ്ചിനീയറിങ്ങ് സൊസൈറ്റി ഏതാനും വർഷം മുൻപ് ലോക ഇലക്ട്രോണിക്സിന് സംഭാവനകൾ നൽകിയ ശാസ്ത്രജ്ഞൻമാരിൽ  അലക്സാണ്ടർ ഗ്രഹാംബല്ലിൻ്റെ തൊട്ടു താഴെ രണ്ടാം സ്ഥാനം നൽകി ബഹുമാനിച്ചു.

അകാലത്തിൽ പൊലിഞ്ഞ് പോയിരുന്നില്ലെങ്കിൽ ഓഡിയോ ഇലക്ട്രോണിക്സ് സംബന്ധമായി എത്ര മഹത്തായ കണ്ടുപിടുത്തങ്ങൾ ആ ജീനിയസിൽ നിന്ന് ഉണ്ടാകുമായിരുന്നു എന്നാലോചിക്കുമ്പോൾ മനസിലൊരു വിങ്ങൽ തോന്നും.

ഓഡിയോ ഇലക്ട്രോണിക്സ് കൈകാര്യം ചെയ്യുന്ന ഓരോ വ്യക്തിയും മറന്ന് പോകാതെ ഇപ്പോൾ തന്നെ മന:പാഠമാക്കുക സ്റ്റീരിയോ ആംപ്ലിഫയറിൻ്റെ പിതാവിൻ്റെ പേര്.അതായിരിക്കും നമ്മൾക്ക് അദ്ദേഗത്തിന് കൊടുക്കാൻ സാധിക്കുന്ന ഏറ്റവും വലിയ ആദരവ്.ചിത്രത്തിൽ  മൂവിങ്ങ് കോയിൽ  റോട്ടറി കട്ടിങ്ങ് ലേത്ത്.

 എഴുതിയത് #അജിത്_കളമശേരി 22.01.2024. #ajithkalamassery.