ELECTRONICS KERALAM

ബേസിക്

 എഴുതിയത്  വിനോദ് വിനു

മാന്യ വായനക്കാരേ,
ഇലക്ട്രോണിക്സ് രംഗത്തേക്ക് കടന്നു വരാൻ താല്പര്യമുള്ളതും എന്നാൽ അതിനാവശ്യമായ വിദ്യാഭ്യാസം ലഭിച്ചിട്ടില്ലാത്തവരും ആയ ആളുകളെ മനസ്സിൽ കണ്ടു കൊണ്ടാണ് ഈ സെക്ഷന്‍ തയ്യാറാക്കിയിരിക്കുന്നത്..ചെറിയ ചില ബാലപാഠങ്ങളിലൂടെ നമുക്ക് ഇലക്ട്രോണിക്സ് രംഗത്തേക്ക് കടക്കാം. ആദ്യമായി സർക്യൂട്ട് സിംബലുകൾ. എന്താണ്  സർക്യൂട്ട് സിംബലുകൾ ?. ഈ ബ്ലോഗിലൂടെ നിങ്ങൾ വായിക്കാനിടയുള്ള പോസ്റ്റുകളിൽ എല്ലാം തന്നെ സർക്യൂട്ടുകളുടെ ചിത്രം കൊടുത്തിരിക്കും.. അവയിൽ കമ്പോണന്റുകളുടെ യഥാർത്ഥ ചിത്രമായിരിക്കില്ല കൊടുത്തിരിക്കുക. പകരം പ്രതീകങ്ങളായ ചിത്രങ്ങളായിരിക്കും. അവയാണ് സർക്യൂട്ട് സിംബലുകൾ. ആദ്യമായി ബാറ്ററി എന്നെ കമ്പോണന്റിന്റെ സിംബലിനേക്കുറിച്ച് മനസ്സിലാക്കാം.
(ചിത്രം 1)
(ചിത്രം 2)
സാധാരണയായി ഇലക്ട്രോണിക്സിൽ ഉപയോഗിക്കാറുള്ള രണ്ടു തരം ബാറ്ററികളാണ് ചിത്രങ്ങളിൽ. ചിത്രം ഒന്ന് പി.പി.3 ബാറ്ററി. ഇത് 9 വോൾട്ടിന്റെ ബാറ്ററിയാണ്. ഏതാനും മില്ലി ആമ്പിയറേ ഇതിൽ ഉണ്ടാവൂ..ചിത്രം രണ്ട് സീൽഡ് ലെഡ് ആസിഡ് ബാറ്ററി അഥവാ എസ്.എൽ.എ. പല വോൾട്ടേജുകളിൽ ലഭ്യമാണെങ്കിലും സാധാരണയായി 12 വോൾട്ട് ആണ് ഉപയോഗിക്കാറ്‌. ഈ ചിത്രത്തിലെ ബാറ്ററി 7 ആമ്പിയറിന്റേതാണ്. ഇതിൽ കാണുന്ന രണ്ടു പിന്നുകളിൽ നിന്നാണ് നമുക്ക് വൈദ്യുതി ലഭിക്കുന്നത്. ഒന്ന് പോസിറ്റീവും മറ്റേത് നെഗറ്റീവും ആണ്. പോസിറ്റീവ് പോൾ ചുവന്ന നിറത്തിൽ മാർക്ക് ചെയ്തിരിക്കുന്നത് ശ്രദ്ധിക്കുക. പി.പി.3 ബാറ്ററിയിൽ പോസിറ്റീവും നെഗറ്റീവും ചിഹ്നം കൊണ്ട് അടയാളപ്പെടുത്തിയിരിക്കും. ഇനി ഇവയുടെ സർക്യൂട്ട് സിംബൽ എന്താണെന്നു നോക്കാം.
 
(ചിത്രം 3)
ഇതാണ് ഒരു സർക്യൂട്ടിലെ ബാറ്ററിയുടെ ചിഹ്നം. ഇതിൽ പോസിറ്റീവും നെഗറ്റീവും യഥാക്രമം ഘടിപ്പിക്കാൻ മാത്രം ശ്രദ്ധിച്ചാൽ മതി. ഇപ്പോൾ വായനക്കാർക്ക് ബാറ്ററിയേക്കുറിച്ച് അടിസ്ഥാന വിവരങ്ങൾ മനസ്സിലായെന്നു കരുതുന്നു. അടുത്ത പോസ്റ്റിൽ മറ്റൊരു കമ്പോണന്റിന്റെ വിവരവുമായി ഉടൻ എത്താം.

കപ്പാസിറ്റർ- അടിസ്ഥാന വിവരങ്ങള്‍

. ഇലക്ട്രോണിക്സിലെ സുപ്രധാന ഘടകമായ കപ്പാസിറ്ററിനെക്കുറിച്ചാണ് വിവരിക്കുന്നത്
വിവിധതരം കപ്പാസിറ്ററുകൾ
.വിവിധ തരം കപ്പാസിറ്ററുകൾ
ഇതാണ്  കപ്പാസിറ്ററിന്റെ ചിത്രം. ഒരു സർക്യൂട്ടിൽ വൈദ്യുതി ചാർജ് ചെയ്യുകയും (ശേഖരിക്കുക) ഡിസ്ചാർജ് ചെയ്യുകയും ആണ് കപ്പസിറ്റർ ചെയ്യുന്നത്. കപ്പാസിറ്ററിന്റെ സർക്യുട്ട് സിംബൽ ഇവയാണ്.

നോൺ പോളറൈസ്‌ഡ് കപ്പാസിറ്റർ സിംബൽ കപ്പാസിറ്ററിന്റെ സർക്യൂട്ട് സിംബലുകൾ
നോൺ പോളറൈസ്‌ഡ് കപ്പാസിറ്റർ സിംബൽ. ഇവ ഒരു സർക്യൂട്ടിൽ ഏതു രീതിയിലും ഘടിപ്പിക്കാവുന്നതാണ്. പോസിറ്റീവോ നെഗറ്റീവോ ഇവയ്ക്കില്ല.

പോളറൈസ്‌ഡ് കപാസിറ്റർ സിംബൽ
പോളറൈസ്‌ഡ് കപ്പാസിറ്റർ സിംബൽ. ഇവ ഘടിപ്പിക്കുമ്പോൾ സർക്യൂട്ടിൽ രേഘപ്പെടുത്തിയിട്ടുള്ള
പോസിറ്റീവ് ചിഹ്നത്തിന്റെ നേരേ ഇവയുടെ പോസിറ്റീവ് ചിഹ്നം വരണം. സാധാരണയായി ഇവയിൽ നെഗറ്റീവ് പോൾ ആണ് മാർക്ക് ചെയ്യാറുള്ളത്. ഇതാ ഈ കപ്പാസിറ്ററിന്റെ ചിത്രം നോക്കൂ. ഇതിൽ മൈനസ് ചിഹ്നം കൊടുത്തിരിക്കുന്നത് കണ്ടില്ലേ, ഇത് നെഗറ്റീവ് സൈഡ് ആണ്.


കപ്പാസിറ്ററുകൾ പല തരത്തിലുണ്ട്.
സെറാമിക് കപ്പാസിറ്റർ
download (3)
പോളറൈസെഡ് ഇലക്ട്രോലിറ്റിക് കപ്പാസിറ്റർ
images (1)
മറ്റുള്ളവയെക്കുറിച്ച് പിന്നീട് വിശദമായി പറയാം.
ഇലക്ട്രോണിക് സർക്യൂട്ടുകളിൽ ധാരാളമായി ഉപയോഗിക്കപ്പെടുന്നവയാണ് സെറാമിക് കപ്പാസിറ്ററുകൾ. സെറാമിക് കപ്പാസിറ്ററുകൾ നോൺ പോളറൈസ്‌ഡ് ആണ്. സാധാ‍രണ സർക്യൂട്ടുകളിൽ കാണാറുള്ള എല്ലാ നോൺ പോളറൈസ്‌ഡ് സിംബലിനും ഇവ ഉപയോഗിച്ചാൽ മതിയാവും. ഇനി മറ്റൊരു ഇനമാണ് ഉപയോഗിക്കേണ്ടതെങ്കിൽ സർക്യൂട്ടിൽ അത് പ്രത്യേകം സൂചിപ്പിച്ചിരിക്കും.
ഇത് കപ്പാസിറ്റർ ഉപയോഗിച്ചു കൊണ്ടുള്ള ഒരു സർക്യൂട്ട് ആണ്.
images (2)
ഈ സർക്യൂട്ടിൽ ഡിസി വോൾട്ടേജിനെ സ്മൂത്ത് ചെയ്യുന്നതിനായാണ് കപ്പാസിറ്ററുകൾ ഉപയോഗിച്ചിരിക്കുന്നത്.  നമ്മുടെ സർക്യൂട്ടിൽ കപ്പാസിറ്ററുകൾ ഉപയോഗിക്കുമ്പോൾ അതിന്റെ മൂല്യം ശ്രദ്ധിച്ചു വേണം ഉൾപ്പെടുത്താൻ. ഉദാഹരണത്തിന്  മുകളിലെ സർക്യൂട്ട് നോക്കുക. അതിൽ 9 വോൾട്ട് ബാറ്ററിയാണ് ഉപയോഗിച്ചിരിക്കുന്നത്. അതിനാൽ സർക്യൂട്ടിൽ പറഞ്ഞിരിക്കുന്ന മ്യൂ എഫ് മൂല്യം ഉള്ളതും 16 വോൾട്ട് എങ്കിലും ശേഷിയുള്ളതും ആയ കപ്പാസിറ്ററാണ് ഉപയോഗിക്കേണ്ടത്. മുകളിലെ ചിത്രത്തിലുള്ള ഇലക്ട്രോലിറ്റിക് കപ്പാസിറ്ററിൽ രേഖപ്പെടുത്തിയിരിക്കുന്നതു കണ്ടോ?. 68 മ്യൂ എഫ് 400 വോൾട്ട് ആണ് അതിന്റെ മൂല്യം. നാം ഒരു 12 വോൾട്ട് സർക്യൂട്ടാണ് ഉപയോഗിക്കുന്നതെങ്കിൽ മിനിമം 25 വോൾട്ട് ശേഷിയുള്ള കപ്പാസിറ്ററെങ്കിലും ഉപയോഗിക്കുക. പവർ സപ്പ്ലൈകളിൽ പരമാവധി ഉയർന്ന മ്യൂഎഫ് മൂല്യം ഉള്ളവ ഉപയോഗിക്കുക. ഉദാ: 4700 മ്യൂ എഫ്, 2200 മ്യൂഎഫ്.

വേരിയബിൾ റെസിസ്റ്റർ

സർക്യൂട്ട് സിംബലുകളിൽ അടുത്തതായി നാം പരിചയപ്പെടാൻ പോകുന്നത് വേരിയബിൾ റെസിസ്റ്റർ ആണ്..പേരിൽ നിന്നു തന്നെ ആളെ മനസ്സിലാക്കാമല്ലോ..വ്യത്യാസപ്പെടുത്താവുന്ന റെസിസ്റ്ററാണ് കക്ഷി. മുൻപു പരിചയപ്പെട്ട സ്ഥിരം മൂല്യമുള്ള റെസിസ്റ്ററിൽ നിന്നും വേരിയബിൾ റെസിസ്റ്ററിനുള്ള വ്യത്യാസം മനസ്സിലായോ..സാധാരണ റെസിസ്റ്റർ 10k മൂല്യം എന്നു പറഞ്ഞാൽ അത് മാറ്റാനവില്ല. അതിന്റെ പ്രതിരോധം അഥവാ തടസ്സം അത്ര തന്നെ എല്ലായ്പ്പോഴും ഉണ്ടാവും. എന്നാൽ വേരിയബിൾ റെസിസ്റ്ററിൽ റെസിസ്റ്റൻസ്  പൂജ്യം മുതൽ ആ റെസിസ്റ്ററിന്റെ പരമാവധി അളവു വരെ വ്യത്യാസപ്പെടുത്താം.. ഉദാഹരണത്തിനു 10k വേരിയബിൾ റെസിസ്റ്റർ എന്നു പറഞ്ഞാൽ അതിന്റെ റെസിസ്റ്റൻസ് 0 മുതൽ 10k വരെ വ്യത്യാസപ്പെടുത്താം എന്നു സാരം. ഇനി നമുക്ക് സർക്യൂട്ട് സിംബലിലേക്ക് ഒImageന്ന് നോക്കാം.. ഇതാണ് വേരിയബിൾ റെസിസ്റ്ററിന്റെ സർക്യൂട്ട് സിംബൽ..സർക്യൂട്ടിൽ ഇതിനെ  “ VR  എന്നും  P എന്നും ആണ്  സൂചിപ്പിക്കുക. ഇതിൽ നമുക്ക് മൂന്നു പിന്നുകൾ കാണാൻ സാധിക്കും. രണ്ട് അഗ്രങ്ങളിലുമായി ഓരോന്ന് , പിന്നെ നടുവിൽ കാണുന്ന അമ്പടയാളത്തിന്റെ അഗ്രം. ഒരു വേരിയബിൾ റെസിസ്റ്ററിൽ നടുക്കുള്ള അമ്പടയാളം എല്ലായ്പ്പോഴും ഔട്ട്പുട്ട് പിൻ ആയിരിക്കും. ഇടത് വലത് പിന്നുകൾ യഥേഷ്ടം ഇൻപുട്ടും ഗ്രൌൻഡും ആയി കണക്ട് ചെയ്യാം. . കൺഫ്യൂഷനായെങ്കിൽ വേരിയബിൾ റെസിസ്റ്ററിന്റെ പ്രവർത്തനം വിശദമാക്കുന്ന ഈ ചിത്രം കൂടി ഒന്നു കണ്ടു നോക്കൂ..,Imageഇതിൽ എ എന്നെഴുതിയ ഭാഗത്ത് ഇൻപുട്ടും ഡബ്ലിയു എന്നെഴുതിയ  ഭാഗത്ത് ഔട്ട്പുട്ടും മൂന്നാമത്തെ പിന്നായ ബിയിൽ ഗ്രൌണ്ടും കണക്ട് ചെയ്യുകയാണെന്നു കരുതുക. ഇൻപുട്ടായി നമ്മൾ 5വോൾട്ട് ഡിസി കണക്ട് ചെയ്യുന്നു എന്നു കരുതുക. ഈ വേരിയബിൾ റെസിസ്റ്ററിന്റെ മർമ്മഭാഗമായ റെസിസ്റ്റീവ് മെറ്റീരിയൽ എന്നെഴുതിയിരിക്കുന്ന ഈ കറുത്ത പാളിയ്ക്ക് ഓരോ ഭാഗത്തും റെസിസ്റ്റൻസ് വ്യത്യാസമുണ്ട്. എ എന്ന പോയിറ്റുമായി മുട്ടുന്ന ഭാഗത്ത്  പൂജ്യം റെസിസ്റ്റൻസ് ആണ് ഉള്ളതെങ്കിൽ ഡബ്ലിയു എന്ന പിൻ മുട്ടുന്ന മുകൾ ഭാഗത്ത് ഏതാണ്ട് 40% ശതമാനത്തോളം ( ടോട്ടൽ റെസിസ്റ്റൻസിന്റെ) റെസിസ്റ്റൻസ് ഉണ്ടാവും. അതായത് എ എന്ന പിന്നിലൂടെ ഈ വേരിയബിൾ റെസിസ്റ്ററിൽ പ്രവേശിക്കുന്ന 5 വോൾടേജ് ഡിസിയുടെ കുറേ ഭാഗത്തെ ഈ റെസിസ്റ്റീവ് മെറ്റീരിയൽ തടഞ്ഞു നിർത്തുകയും ശേഷിച്ച ഭാഗം ഡബ്ലിയു എന്നെഴുതിയ ഔട്ട്പുട്ട്പിന്നിലൂടെ പുറത്തേക്ക് വരികയും ചെയ്യും. അപ്പോൾ ഈ 5 വോൾട്ട് എന്നത് റെസിസ്റ്റൻസ്  അനുസരിച്ച് മൂന്നോ നാലോ രണ്ടോ ഒക്കെയായി ചുരുങ്ങും. ഇപ്പോൾ നിങ്ങൾക്ക് വേരിയബിൾ റെസിസ്റ്ററിന്റെ പ്രവർത്തനം മനസ്സിലായിക്കാണുമെന്ന് കരുതുന്നു. നമ്മുടെ വീടുകളിൽ ഉപയോഗിക്കുന്ന ടിവിയിലെയും സിഡി പ്ലേയറിലേയും റേഡിയോയിലേയും ഒക്കെ വോളിയം കൺ‌ട്രോളുകൾ വേരിയബിൾ റെസിസ്റ്ററുകളാണ്. ഇനി വേരിയബിൾ റെസിസ്റ്റർ ഉപയോഗിച്ചുള്ള ഒരു ലളിതമായ സർക്യൂട്ട് ഒന്നു കാണാം.
Imageഇത് ഒരു മിക്സറിന്റെ സർക്യൂട്ട് ആണ്. സിഗ്നൽ ഒന്ന് , രണ്ട് എന്നിവിടങ്ങളിൽ വരുന്ന ശബ്ദതരംഗങ്ങളുടെ ശക്തി നിയന്ത്രിച്ച് അവയെ ആവശ്യത്തിനു മാത്രം സിഗ്നൽ ഔട്ടിൽ എത്തിക്കുക എന്നതാണ് ഇവിടുത്തെ വേരിയബിൾ റെസിസ്റ്ററിന്റെ ജോലി. ഉദാഹരണത്തിനു ഈ സർക്യുട്ടിലുള്ള മിക്സർ ഉപയോഗിച്ച് നാം ഒരു കരോക്കെ ഗാനമേള നടത്തുകയാണെന്നു കരുതുക. സിഗ്നൽ ഒന്നിൽ പാടുന്ന നമ്മുടെ ശബ്ദവും രണ്ടിൽ കരോക്കെ പശ്ചാത്തല സംഗീതവും കണക്ട് ചെയ്യുന്നു. ഇതിൽ നമ്മുടെ ശബ്ദമാണോ പശ്ചാത്തല സംഗീതത്തിന്റെ ശബ്ദമാണോ കൂടുതൽ കേൾക്കേണ്ടത് എന്ന് ഓരോ വേരിയബിൾ റെസിസ്റ്ററും തിരിച്ചാൽ നിശ്ചയിക്കാൻ സാധിക്കും…വേരിയബിൾ റെസിസ്റ്റർ ആളു കൊള്ളാം അല്ലേ… ഇനി കക്ഷിയുടെ യഥാർത്ഥ ചിത്രം ഒന്ന് കാണാം. Image  Image
.

റെസിസ്റ്റർ (Resistor)

അടുത്തതായി നമ്മൾ പരിചയപ്പെടാൻ പോകുന്ന ഇലക്ട്രോണിക് കമ്പോണന്റാണ് റെസിസ്റ്റർ

(ചിത്രം 1 റെസിസ്റ്റർ 1K)
ഒരു സർക്യൂട്ടിലെ വൈദ്യുതിപ്രവാഹത്തിൽ നമ്മൾ ഏർപ്പെടുത്തുന്ന പ്രതിരോധം അഥവാ തടസ്സമാണ് റെസിസ്റ്റൻസ്. റെസിസ്റ്റൻസ് അളക്കുന്ന ഏകകം ഓം (OHM) എന്ന് അറിയപ്പെടുന്നു. അതായത് ചിത്രത്തിൽ കാണുന്ന റെസിസ്റ്റർ നമ്മൾ ഒരു സർക്യൂട്ടിൽ ഘടിപ്പിച്ചാൽ അത് ആ സർക്യൂട്ടിൽ ആയിരം ഓമിനു തുല്യമായ തടസ്സം അഥവാ പ്രതിരോധം സൃഷ്ടിക്കുന്നു. 1000 ഓം മുതൽ എളുപ്പത്തിനായി കിലോ ഓം എന്നാണ് പറയുക. ഒരു ലക്ഷം ഓം മുതൽ മെഗാ ഓം എന്നും പറയുന്നു. സർക്യൂട്ടുകളിൽ ഇവയെ സൂചിപ്പിക്കുന്നത് അക്ഷരവും ചിഹ്നവും ഉപയോഗിച്ചാണ്. ഓമിന്റെ ചിഹ്നം Ω ആണ്. ഉദാഹരണത്തിന് 1000 ഓമിന്റെ ഒരു റെസിസ്റ്ററിനെ സൂചിപ്പിക്കാൻ 1kΩ എന്നാണ് എഴുതുക ഒരു ലക്ഷം ഓമിന്റെ റെസിസ്റ്ററിനെ സൂചിപ്പിക്കാൻ 1M Ω എന്നും എഴുതും. ആയിരത്തിനു താഴോട്ടുള്ള റെസിസ്റ്റൻസിനെ സൂചിപ്പിക്കാൻ R എന്നോ E എന്നോ Ω ചിഹ്നം മാത്രമോ ഉപയോഗിക്കാറുണ്ട്. ഉദാഹരണത്തിന് 470 ഓമിന്റെ റെസിസ്റ്ററിനെ സൂചിപ്പിക്കാൻ 470 R എന്നോ 470E എന്നോ 470 Ωഎന്നോ ഉപയോഗിക്കാറുണ്ട്. ഇപ്പോൾ നിങ്ങൾ ചിന്തിക്കുന്നുണ്ടാവും ഈ റെസിസ്റ്ററിനെ എങ്ങിനെയാ ആയിരം ഓം എന്നു തിരിച്ചറിയുന്നതെന്ന്..അതിലാണെങ്കിൽ ഒന്നും എഴുതിയിട്ടുമില്ലല്ലോറെസിസ്റ്ററിനെ തിരിച്ചറിയുന്നത് കളർ കോഡിംഗിലൂടെയാണ്..അതായത് റെസിസ്റ്ററിൽ രേഖപ്പെടുത്തിയിട്ടുള്ള നിറങ്ങൾ ക്രമമായി പരിശോധിച്ചാണ് അത് എത്രഓമിന്റെ റെസിസ്റ്ററാണ് എന്നു തിട്ടപ്പെടുത്തുന്നത്. മുകളിൽ കൊടുത്തിട്ടുള്ള റെസിസ്റ്ററിൽ നാലു നിറങ്ങളിലുള്ള വളയങ്ങൾ കണ്ടില്ലേ..അവയിൽ നിന്നാണ് ഈ റെസിസ്റ്ററിന്റെ മൂല്യം മനസ്സിലാക്കുന്നത്. അതിൽ മൂന്നു നിറങ്ങൾ അടുത്തും പിന്നെ ഒരു സ്വർണ്ണ നിറത്തിലുള്ള വളയം അല്പം അകന്നുമാണ് കാണപ്പെടുന്നത്. മൂല്യം അളക്കാൻ ആദ്യ മൂന്നു നിറങ്ങൾ ഉപയോഗിക്കുന്നു. അവസാന നിറം റെസിസ്റ്ററിന്റെ ടോളറൻസ് അളവു കാണിക്കാനും ഉപയോഗിക്കുന്നു. റെസിസ്റ്റർ സൃഷ്ടിക്കുന്ന തടസ്സം അഥവാ പ്രതിരോധത്തിൽ ഉണ്ടാവുന്ന ഏറ്റക്കുറച്ചിലുകളാണ് ടോളറൻസ് എന്നതു കൊണ്ട് ഉദ്ദേശിക്കുന്നത്. ചിത്രത്തിൽ ഉള്ളത് സ്വർണ്ണവളയമായതിനാൽ ഇത് 5% ടോളറൻസ് ഉള്ള റെസിസ്റ്ററാണ്. അതായത് ഇതിന്റെ മൂല്യം ആയ 1000 ഓമിന്റെ 5 ശതമാനം കൂടുതലോ കുറവോ റെസിസ്റ്റൻസ് ഇതിനുണ്ടാകാം എന്ന്. കൃത്യമായിപ്പറഞ്ഞാൽ ഈ റെസിസ്റ്റർ 1050 ഓമിനും 950 ഓമിനും ഇടയ്ക്ക് റെസിസ്റ്റൻസ് സൃഷ്ടിക്കും എന്നാണ്. ഇനി ആദ്യ മൂന്നു നിറങ്ങൾ ഉപയോഗിച്ച് എങ്ങിനെ റെസിസ്റ്റൻസ് അളക്കാം എന്നു നോക്കാം

റെസിസ്റ്റർ കളർ കോഡിംഗിൽ ഓരോ നിറത്തിനും ഓരോ മൂല്യമുണ്ട്.
ആകെ പതിനൊന്നു നിറങ്ങളാണ് കോഡിംഗിനായി ഉപയോഗിക്കുന്നത്
നിറം                                               മൂല്യം                            ഗുണന മൂല്യം                     ടോളറൻസ് മൂല്യം
ബ്ലാക്ക് 0 1
ബ്രൌൺ 1 10 1.00%
റെഡ് 2 100 2.00%
ഓറഞ്ച് 3 1000
യെല്ലോ 4 10000
ഗ്രീൻ 5 100000
ബ്ലൂ 6

വയലറ്റ് 7

ഗ്രേ 8

വൈറ്റ് 9

ഗോൾഡ് 0.1
5.00%
സിൽ‌വർ 0.01
10.00%
മൂല്യം അളക്കുന്ന മൂന്ന് അക്കങ്ങളിൽ മൂന്നാമനെയാണ് ഗുണിക്കാനുപയോഗിക്കുന്നത് . അതായത് മുകളിൽ കൊടുത്തിട്ടുള്ള റെസിസ്റ്ററിൽ ആദ്യ രണ്ട് നിറങ്ങളുടെ മൂല്യത്തെ മൂന്നാമത്തെ നിറത്തിന്റെ മൂല്യം കൊണ്ട് ഗുണിക്കുന്നു. ഇവിടെ ആദ്യ നിറം ബ്രൌൺ = 1, രണ്ടാം നിറം ബ്ലാക്ക് = 0. അപ്പോൾ നമുക്ക് 10 എന്ന സംഖ്യ കിട്ടുന്നു. അതിനെ മൂന്നാമത്തെ നിറത്തിന്റെ ഗുണന മൂല്യം കൊണ്ട് ഗുണിക്കുക. ഇവിടെ മൂന്നാമത്തെ നിറം റെഡ് ആയതിനാൽ അതിന്റെ ഗുണന മൂല്യം ആയ നൂറ് കൊണ്ട് പത്തിനെ ഗുണിച്ചാൽ ആയിരം എന്നു കിട്ടുന്നു. ഇതിന്റെ ടോളറൻസ് മൂല്യത്തിനുള്ള നിറം ഗോൾഡ് ആയതിനാൽ 5 % ടോളറൻസ് എന്നും കണക്കാക്കാം
സർക്യൂട്ട് സിംബൽ
റെസിസ്റ്ററിന്റെ സർക്യൂട്ട് സിംബൽ താഴെക്കൊടുത്തിരിക്കുന്നു.


ഈ രണ്ടു സിംബലുകളാണ് പൊതുവേ റെസിസ്റ്ററിനെ സൂചിപ്പിക്കാൻ സർക്യൂട്ടിൽ ഉപയോഗിക്കുന്നത്. ഇതിൽ ആദ്യത്തേതാണ് സാധാരണം. ഇനി റെസിസ്റ്റർ ഉപയോഗിച്ചുള്ള ഒരു സർക്യൂട്ട് ഒന്നു നോക്കാം.



റെസിസ്റ്ററുകളും വേരിയബിൾ റെസിസ്റ്ററുകളും ഉപയോഗിച്ചുള്ള ഒരു മിക്സർ സർക്യൂട്ടാണ് ചിത്രത്തിൽ. വേരിയബിൾ റെസിസ്റ്റർ എന്താണ് എന്ന് പിന്നീട് വിശദീകരിക്കാം. ഈ സർക്യൂട്ടിൽ 10K യുടെ റെസിസ്റ്ററുകളാണ് ഉപയോഗിച്ചിട്ടുള്ളത്. റെസിസ്റ്ററുകൾ പല വലിപ്പത്തിൽ ലഭ്യമാണ്. താപം ചെറുക്കാനുള്ള കഴിവിനനുസരിച്ചാണ് പലവലിപ്പത്തിൽ ഇവയെ തരം തിരിച്ചിരിക്കുന്നത്. വാട്സ് അളവിലാണ് താപസംവഹനശേഷി അളക്കുന്നത്. ഏറ്റവും കുറഞ്ഞ വാട്സ് അളവ് 125 mW ആണ്. അതിനടുത്തത് 250 mW. അതിനടുത്തത് 500 mW. പിന്നെ 1 W . പിന്നെ 2,5,10 അങ്ങിനെ പോകുന്നു.

(പല വാട്സുകളിലുള്ള റെസിസ്റ്ററുകൾ )
ഒരു സർക്യൂട്ടിൽ റെസിസ്റ്റർ ഘടിപ്പിച്ചാൽ അതിലേക്ക് വരുന്ന കറന്റിൽ കുറച്ചു മാത്രം കടത്തി വിട്ട് ബാക്കിയുള്ളതിനെ തടയുകയാണ് റെസിസ്റ്ററിന്റെ ജോലി. തടയുന്നത് എത്രയാണെന്ന് റെസിസ്റ്ററിന്റെ മൂല്യം അനുസരിച്ചിരിക്കും. തടയപ്പെടുന്ന കറന്റ് താപമായാണ് നഷ്ടപ്പെടുന്നത്. ഇങ്ങനെ സർക്യൂട്ടിലുണ്ടാകുന്ന താപം വഹിക്കാൻ കഴിവുള്ള റെസിസ്റ്ററുകളാണ് സർക്യൂട്ടിൽ ഉൾപ്പെടുത്തേണ്ടത്.
എസ്.എം.ഡി. റെസിസ്റ്ററുകൾ
ആധുനികയുഗത്തിൽ ഇലക്ട്രോണിക് ഉപകരണങ്ങളുടെ വലിപ്പം ഗണ്യമായി കുറയ്ക്കുന്നതിനു സഹായിച്ച കമ്പോണന്റുകളാണ് എസ്.എം.ഡി. അഥവാ സർഫേസ് മൌണ്ടഡ് ഡിവൈസസ്. ഇവ സാധാരണ കമ്പോണന്റുകളേപ്പോലെ ബോർഡിലെ ദ്വാരങ്ങളിൽ ഇറക്കി വെച്ച് സോൾഡർ ചെയ്യേണ്ടതില്ല. പകരം ബോർഡിന്റെ ഉപരിതലത്തിൽ വെച്ച് സോൾഡർ ചെയ്യാവുന്നതാണ്. റെസിസ്റ്ററുകളിലും എസ്.എം.ഡി ഉണ്ട്. അത്തരക്കാരനെ ഒന്നു പരിചയപ്പെടാം.

വലതുവശത്തു കാണുന്നതാണ് എസ്.എം.ഡി റെസിസ്റ്റർ. ഇടതുവശത്തെ ചിത്രത്തിൽ ഇത്തരം റെസിസ്റ്ററുകൾ ഘടിപ്പിച്ച ഒരു പ്രിന്റഡ് സർക്യൂട്ട് ബോർഡ് ആണ്.
ഇപ്പോൾ നിങ്ങൾക്ക് റെസിസ്റ്റർ എന്താണ് എന്ന് പിടികിട്ടിയെന്ന് ഊഹിക്കുന്നു.
.

സർക്യൂട്ട് സിംബലുകൾ


5 comments:

  1. Dear Sir,
    ഞാൻ മലപ്പുറം ജില്ലയിലെ മഞ്ചേരിയിൽ ആണ്. എന്റെ വീട്ടിൽ റേഡിയോ മാന്ഗോ എഫ് എം ലഭിക്കാൻ വേണ്ടി ഞാൻ സ്വയം ആന്റിന ഉണ്ടാക്കി ഉപയോഗിച്ചിരുന്നു. അതിൽ ടീവീയുടെ ബൂസ്റ്റെർ ഉപയോഗിച്ചിരുന്നു. പക്ഷെ ഒരു ആറു മാസം കഴിഞ്ഞാൽ ഈ ബൂസ്റ്റെർ നാശമാവുന്നു. എന്റെ സുഹൃത്തുക്കളുടെ കാറിൽ ഒരു ആന്റിനയുടെയും സഹായമില്ലാതെ റേഡിയോ മാന്ഗോ വ്യക്തമായി ലഭിക്കുന്നു. അത് കാറിൽ ഉപയോഗിച്ചിരിക്കുന്ന സ്ടീരിയോയുടെ ക്വാളിറ്റി ആണെന്ന് അറിയാം. അത് വീട്ടാവശ്യത്തിന് വേണ്ടി വാങ്ങുന്നത് മുതലാവില്ല. നല്ല വിലയാണ്. വളരെ കുറഞ്ഞ ചെലവിൽ (കാറിൽ ഉപയോഗിച്ചിരിക്കുന്ന സ്ടീരിയോയുടെ ക്വാളിറ്റിയിൽ) എഫ് എം മാത്രം ലഭിക്കാൻ ഉതകുന്ന സർക്ക്യൂട്ട്‌ കളോ, റേഡിയോയോ വിപണിയിലോ ഓണ്‍ലൈൻ ലോ ഉണ്ടോ ? ദയവായി എനിക്ക് മെയിൽ ചെയുക . No need in malayalam. you can mail in Engilsh
    dolonew@gmail.com

    ReplyDelete
  2. circuit ലെ resistors എങ്ങനെ ആണു പരിശോധിക്കുക

    ReplyDelete
    Replies
    1. remove one leg of the resistor from the circuit and check with m/meter

      Delete
  3. Malayalam PDF tharumo?(electronics base for symbol's)

    ReplyDelete
  4. അടുത്ത പേജ് എങ്ങനെ എടുക്കാം ? (ബേസിക് ന്‍റെ രണ്ടാമത്തെ പേജ് )

    ReplyDelete